(អាមេរិក)៖ អង្គការ NASA បាននិយាយថា ប្រសិនបើអ្វីៗ​ទាំងអស់ប្រព្រឹត្តទៅ​តាមការគ្រោងទុកនោះ យានអវកាស New Horizons នឹងធ្វើការហោះ Flyby ទៅកៀកនឹងគោលដៅ​បន្ទាប់របស់ខ្លួនដល់​ទៅបីដង ធៀបនឹង​ភពភ្លុយតូ (Pluto) ដែលជា​គោលដៅ​ចាស់របស់វា កាលពីខែកក្កដា ឆ្នាំ២០១៥។ នេះបើតាមការ​ដកស្រង់ពីវែបសាយ Space នៅព្រឹកថ្ងៃអង្គារ ទី១២ ខែកញ្ញា ឆ្នាំ២០១៧។

យោងតាមសេចក្តីប្រកាស​របស់ក្រុមមន្រ្តី NASA នាពេលថ្មីៗនេះ ក្រុមការងារ​បេសកកម្ម New Horizon មានបំណងធ្វើការ​បញ្ជា​​យានអវកាសនេះ ទៅត្រឹមចម្ងាយ ៣,៥០០គីឡូម៉ែត្រប៉ុណ្ណោះ ពីវត្ថុអវកាសមួយ​ដែលស្ថិតនៅដ៏​សែនឆ្ងាយ មាន​ឈ្មោះ​ថា 2014 MU69 នាថ្ងៃទី០១ ខែមករា ឆ្នាំ២០១៩។ ក្នុងអំឡុងនៃ​ការហោះ Flyby ជាប្រវត្តិសាស្រ្តរបស់វា ទៅក្បែរភពភ្លុយតូ​កាល​ពីថ្ងៃទី១៤ ខែកក្កដា ឆ្នាំ២០១៥ យាន New Horizon មិនធ្លាប់ដែលទៅជិត​ផ្ទៃរបស់ ភពមិនពេញលក្ខណៈនេះ ឆ្ងាយជាង​ចម្ងាយ​​៧,៨០០គីឡូម៉ែត្រ​ឡើយ។

គួរបញ្ជាក់ថា បេសកកម្មតម្លៃ ៧០០លានដុល្លារ New Horizons បានចាប់ផ្តើមធ្វើ​ដំណើទៅកាន់​លំហអាកាស កាលពីខែ​មករា ឆ្នាំ២០០៦។ យានអវកាសនេះ បានថតយករូបភាព​ដំបូងបំផុតនៃភព Pluto នៅក្នុងអំឡុង​ពេលហោះ Flyby កាលពី​ឆ្នាំ២០១៥​របស់វា ហើយខណៈពេល​នេះ New Horizons កំពុងបន្តឆ្ពោះ​ទៅកាន់ 2014 MU69 ក្រោយចាកចេញ​ពីភពភ្លុយ​តូ​ ដែលជាគោលដៅស្រាវជ្រាវ​ដំបូងរបស់វា កាលពីឆ្នាំ២០១៥៕