(ប៉េកាំង)៖ សកម្មជនការពារសិទ្ធិមនុស្សតៃវ៉ាន់ម្នាក់ ដែលកំពុងជាប់ក្ដីក្ដំានៅក្នុងប្រទេសចិន នៅថ្ងៃចន្ទនេះ បានសារភាពថា ខ្លួនពិតជាបានធ្វើសកម្មភាពប្រឆាំងព្យាយាមផ្ដួលរំលំរដ្ឋាភិបាលទីក្រុងប៉េកាំង ប្រាកដមែន។ នេះបើតាមវីដេអូសារភាពរបស់ជនជាប់ចោទ ដកស្រង់ដោយសារព័ត៌មាន Channel News Asia នៅរសៀលថ្ងៃចន្ទ ទី១១ ខែកញ្ញា ឆ្នាំ២០១៧។
លោក លី មីងជេ (Lee Ming-che) គឺជាគូ្របង្រៀនសហគមន៍ ដែលគេស្គាល់ថា ជាសកម្មជនការពារសិទ្ធិមនុស្ស និងជាអ្នកគាំទ្រលិទ្ធិប្រជាធិបតេយ្យម្នាក់ បានបាត់ខ្លួនដោយអាថ៌កំបាំងនៅពេលលោក ធ្វើដំណើរមកកាន់ប្រទេសចិន កាលពីខែមីនាកន្លងទៅ ហើយក្រោយមកទៀតទើបអាជ្ញាធរចិនទទួលស្គាល់ថា លោក Lee ត្រូវបានចាប់ខ្លួន ក៏ដូចជាកំពុងស្ថិតនៅក្រោមការស៊ើបអង្កេត ពាក់ព័ន្ធនឹងការសង្ស័យថា បានធ្វើសកម្មភាពបំផ្លាញសន្តិសុខជាតិ។
ដោយឡែក នៅក្នុងវីដេអូដែលត្រូវបានចេញផ្សាយ នៅលើបណ្ដាញទំនាក់ទំនងសង្គមដោយតុលាការ យឿយ៉ាង (Yueyang) ស្ថិតនៅភាគកណ្ដាលខេត្ត ហ៊ូណា (Hunan) សកម្មជនសិទ្ធិមនុស្សរូបនេះ បានទទួលយកការចោទប្រកាន់ និងសម្ដែងការសោកស្ដាយ។ លោក Lee បានលើកឡើងយ៉ាងដូច្នេះថា «ខ្ញុំបានបង្កើនការរិះគន់ និងបង្កាច់បង្ខូចប្រឆាំងនឹងរដ្ឋាភិបាល គណបក្សកុម្មុយនីស្ដចិន រួមទាំងប្រព័ន្ធនយោបាយចិនបច្ចុប្បន្ន ហើយខ្ញុំក៏បានញុះញង់ឱ្យមានការតស៊ូផ្ដួលរំលំរដ្ឋអំណាចផងដែរ»។
តែទោះជាយ៉ាងក្ដី ប្រពន្ធលោក Lee គឺលោកស្រី Lee Ching-yu មិនបានទទួលស្គាល់វីដេអូសារភាពរបស់ប្ដីខ្លួនឡើយ ខណៈក្រុមសកម្មជនប្រជាធិបតេយ្យខ្លះគិតថា លោក Lee ទទួលរងសម្ពាធ ឬការបំភិតបំភ័យពីរដ្ឋាភិបាលទីក្រុងប៉េកាំង៕
