(វ៉ាស៊ីនតោន)៖ អាជ្ញាធរអាមេរិក បានឱ្យដឹងថាផ្ទះសម្បែងប្រជាជន និងហាងលក់ដូរច្រើនជាង ១៩៥,០០០ខ្នង ដាច់ចរន្តអគ្គិសនីប្រើប្រាស់ ខណៈខ្យល់ព្យុះហឺរីខិន Irma ធ្វើដំណើរមកដល់ ចំងាយ១៤៤ គីឡូម៉ែត្រពីទីក្រុង Key West នៃរដ្ឋផ្លូរីដា។ នេះបើតាមការចេញផ្សាយដោយសារព័ត៌មាន USA TODAY នៅថ្ងៃអាទិត្យ ទី១០ ខែកញ្ញា ឆ្នាំ២០១៧។

ជាមួយគ្នានោះ អភិបាលរដ្ឋផ្លូរីដា លោក Rick Scott បានប្រាប់ឱ្យប្រជាជនដែលត្រូវបានបង្គាប់ឱ្យចាកចេញពីផ្ទះសម្បែងរបស់ខ្លួន ត្រូវតែធ្វើដំណើរទៅកាន់ជម្រក ស្នាក់នៅបណ្ដោះអាសន្ន ដើម្បីគេចចេញពីគ្រោះថា្នក់។ យោងតាមអភិបាលរដ្ឋផ្លូរីដា លោក Rick Scott វាយឺតពេលបន្តិចទៅហើយក្នុងការគេចចេញពីតំបន់គ្រោះថ្នាក់ ប៉ុន្តែអាជ្ញាធរបានត្រៀមខ្លួនរួចស្រេច ការពារសុវត្ថិភាពប្រជាជនតាមដែល អាចធ្វើទៅបាន ដូច្នេះប្រជាជនដែលត្រូវបង្គាប់ឱ្យជម្លៀសខ្លួនត្រូវតែចាកចេញពីផ្ទះរបស់ពួកគេទៅកាន់ទីជម្រកបណ្ដោះអាសន្ន។ លោក Rick Scott បានបន្ថែមទៀតថា ប្រជាជន៦.៣លាននាក់ ឬច្រើនជាង២៥ភាគរយ នៃប្រជាជនអាមេរិកក្នុងរដ្ឋផ្លរីដា ត្រូវបានបង្គាប់ឱ្យជម្លៀសខ្លួន និងជិត៣.៤លាននាក់អាចនឹងប្រឈមមុខគ្មាន អគ្គិសនីប្រើប្រាស់។

គួរបញ្ជាក់ថា ខ្យល់ព្យុះហឺរីខិន Irma ដែលបានវាយប្រហារបណ្តាប្រទេសនៅក្នុងសមុទ្រការីបៀន បាន​សម្លាប់មនុស្ស ២០នាក់ និងកំពុងចាប់ផ្ដើមវាយប្រហារលើរដ្ឋផ្លូរីដា ជាមួយល្បឿន ខ្យល់បក់អតិបរាម៉ា១៩៣គីឡូម៉ែត្រក្នុងមួយម៉ោង។ ដោយឡែកកាលពីប៉ុន្មាន​សប្ដាហ៍មុន ខ្យល់ព្យុះ Hurricane Harvey ដែលបាន​វាយប្រហារ​មកលើរដ្ឋតិចសាស់​តាំងតែពី​ថ្ងៃទី២៥ ខែសីហា និងបានបង្កជា​ទឹកជំនន់អាក្រក់បំផុតនៅក្នុង ប្រវត្តិសាស្ត្រ​អាមេរិក អស់រយៈពេល ៥០ឆ្នាំមកនេះ បានបង្ខំឱ្យ​​អាជ្ញាធរជម្លៀសមនុស្ស​ជាង ១លាននាក់ ទៅកាន់កន្លែងមាន​សុវត្ថិភាព, ផ្ទះ​ជាង ២០០,០០០ខ្នង ត្រូវបានបំផ្លាញ និងមនុស្ស៦០នាក់បានបាត់បង់ជីវិត។ គ្រោះមហន្តរាយធម្មជាតិទាំងនេះ កើតឡើយនៅចំពេលដែលប្រធានាធិបតីអាមេរិក លោក ដូណាល់ ត្រាំ សម្រេចចិត្តដកសហរដ្ឋអាមេរិកពីកិច្ចព្រមព្រៀងស្ដីពីបម្រែប្រួលអាកាសធាតុទីក្រុងប៉ារីស៕ ​