(សេអ៊ូល)៖ ការដាក់ទណ្ឌកម្មជាឯកតោភាគីជាច្រើនរួចមកហើយ ពីសំណាក់រដ្ឋបាលអាមេរិកនៅមិនទាន់​គ្រប់គ្រាន់នោះឡើយ ដោយនៅថ្ងៃនេះអាមេរិកបានប្រកាសថា សំណើជាផ្លូវការត្រូវបានបញ្ជូនទៅដល់ ក្រុមប្រឹក្សាសន្តិសុខនៃអង្គការសហប្រជាជាតិ (UNSC) ហើយ ដើម្បីអំពាវនាវឲ្យគ្រប់គ្នាបោះឆ្នោតគាំទ្រ​សេចក្តីព្រាងទណ្ឌកម្មថ្មីមួយ ដើម្បីបន្ថែមសម្ពាធធ្ងន់ធ្ងរជាងមុន ទៅលើរបបកុម្មុយនិស្តទីក្រុងព្យុងយ៉ាង។ នេះបើតាមការចេញផ្សាយដោយ សារព័ត៌មាន យ៉ុនហាប់ នារសៀលថ្ងៃសៅរ៍ ទី០៩ ខែកញ្ញា ឆ្នាំ២០១៧។

បេសកកម្មអាមេរិក ទៅកាន់អង្គការសហប្រជាជាតិ បានចេញនូវសេចក្តី​ថ្លែងការណ៍មួយ ដោយបាន​បញ្ជាក់ថា ខ្លួនបាន​ស្នើឲ្យ UNSC រៀបចំការបោះឆ្នោត​មួយ នៅថ្ងៃទី១១ ខែកញ្ញា សប្តាហ៍​ក្រោយនេះ ដើម្បីបោះឆ្នោត​សម្រេចទៅលើ​សេចក្តីព្រាង​ចុងក្រោយ ក្នុងគោលដៅ​បន្ថែមទណ្ឌកម្ម​កាន់តែខ្លាំងជាងមុន ទៅលើ​ប្រទេស​កូរ៉េខាងជើង។ សម្រាប់ទណ្ឌកម្មថ្មីៗ​បន្ថែមទៀតនេះរួមមាន ការហាមឃាត់​ការនាំចូលប្រេង​ទៅទីក្រុង​ព្យុងយ៉ាង, ការបង្អក​ទ្រព្យសម្បត្តិ លោក គីម ជុងអ៊ុន, និងហាមឃាត់​ការនាំចេញវាយនភណ្ឌ​ពីកូរ៉េខាងជើង។

គួរបញ្ជាក់ថា បើតាមប្រភពពីអ្នកជំនាញការទូតមួយរូប ដែលសុំមិនបញ្ចេញឈ្មោះបានប្រាប់ AFP ថា ប្រទេសចិន និងរុស្ស៊ី ដែលនៅតែមានសម្ព័ន្ធភាពជិតស្និទ្ធជាមួយទីក្រុងព្យុងយ៉ាងនោះ អាចនឹងមិនបោះឆ្នោត​គាំទ្រតែទៅលើចំណុចទាំងអស់ ដោយសារតែវាប៉ះពាល់ផលប្រយោជន៍របស់ពួកគេរៀងៗខ្លួន ប៉ុន្តែសម្រាប់ចំណុចរឿង​ហាមឃាត់ ការនាំចេញវាយនភណ្ឌ​របស់កូរ៉េខាងជើងនោះ ត្រូវបានគេប៉ាន់ស្មានថា ប្រទេសរុស្ស៊ី និងចិន នឹងមិនមានការជំទាស់នោះឡើយ៕