(ម៉ិចស៊ីកូ)៖ មនុស្សយ៉ាងតិចកើនដល់៦១នាក់ហើយបានស្លាប់ ក្រោយហេតុការណ៍គ្រោះរញ្ជួយដីដ៏ខ្លាំងក្លា​មហិក​មា ដែល បាន​អង្រួនកក្រើកបណ្តោយ​ឆ្នេរភាគខាងត្បូង ប្រទេសម៉ិចស៊ីកូ កាលពីម្សិលមិញ។ នេះ​បើ​តាម​ការ​ចេញ​ផ្សាយ​ដោយ​សារ​ព័ត៌​មាន​ ABC News នៅព្រឹក​​ថ្ងៃ​សៅរ៍ ទី០៩ ខែកញ្ញា ឆ្នាំ២០១៧។

ប្រធានាធិបតីម៉ិចស៊ីកូលោក Enrique Pena Nieto បានថ្លែងឲ្យដឹងថា មនុស្សចំនួន៦១បានបាត់បង់ជីវិត ដោយ៤៥នាក់​​នៅរដ្ឋ Oaxaca, ១២នាក់នៅរដ្ឋ Chiapas, និង០៤នាក់នៅរដ្ឋ Tabasco ហើយលោក បានសម្រេចប្រកាសយកពេល​​០៣ថ្ងៃ ដើម្បីធ្វើការកាន់ទុក្ខដល់ជនរងគ្រោះទូទាំងប្រទេស។ ក្រៅពីមានមនុស្សស្លាប់ គ្រោះរញ្ជួយដីខាងលើ ថែមទាំង​បានដួលរលំអគារជាង៤០០ខ្នង និងប្រមាណ១,៧០០ខ្នងទៀតបានទទួលរងការខូចខាតផងដែរ។

គួរបញ្ជាក់ថា ចំណុយរញ្ជួយរបស់គ្រោះមហន្តរាយធម្មជាតិខាងលើ មានជម្រៅ៣៣គីឡូម៉ែត្រក្រោមផ្ទៃសមុទ្រ នៅចម្ងាយ​​១២៣​គីឡូ​ម៉ែត្រ​ភាគ​និរតី ពីទីក្រុង Pijijiapan នៃរដ្ឋ Chiapas។ បើតាមទីភ្នាក់ងារស្ទាបស្ទង់ភូមិសាស្រ្តអាមេរិក (USGS) វា​​មានកម្រិត៨.១រ៉ិចទ័រ ខណៈលោក Enrique Pena Nieto បានអះអាងថា វាមានកម្រិត៨.២រ៉ិចទ័រ គឺ​ខ្លាំងក្លាជាងគេបង្អស់​ប្រចាំ​ប្រវត្តិ​សាស្រ្ត​ម៉ិចស៊ីកូ ក្នុងអំឡុងពេលមួយសតវត្សរ៍កន្លងទៅនេះ ដោយកម្រិតរញ្ជួយរបស់វា​ ធំជាងគ្រោះរញ្ជួយ​ដី​កាល​ពី​ឆ្នាំ​១៩៨៥ ដែលបានឆក់យកជិវិតមនុស្សយ៉ាងតិច៥,០០០នាក់ នៅតាមបណ្តារដ្ឋចំនួន​០៤​​របស់​ម៉ិចស៊ីកូទៅទៀត៕