(វ៉ាស៊ីនតោន)៖ អតីតប្រធានាធិបតី​អាមេរិក ០៥រូប បានចូលរួមជាកម្លាំង​ក្នុងការរៃអង្គាស​ប្រាក់ ដើម្បីជួយដល់​ជនរងគ្រោះដោយសារ​តែព្យុះហឺរីខិន ហាវេយ (Hurricane Harvey) ក៏ដូចជា​កសាងផ្ទះ​សម្បែង ប្រជាជនរាប់ពាន់ខ្នង និងជួសជុលការខូចខាត​ពាណជ្ជកម្ម​ឡើងវិញចាប់ពីរដ្ឋ តិចសាស់ (Texas) រហូតដល់រដ្ឋ ល្វីស្យ៉ាណា (Louisiana​)។ នេះបើតាមការ​ចេញផ្សាយ​ដោយ​សារព័ត៌មាន Channel News Asia នៅព្រឹកថ្ងៃសុក្រ ទី០៨ ខែកញ្ញា ឆ្នាំ២០១៧។

យុទ្ធនាការរៃអង្គាសប្រាក់​នេះមានឈ្មោះថា «ការអំពាវនាវអាមេរិកតែមួយ» ឬ «One America Appeal»​ ដែលបានប្រកាសចាប់​ផ្ដើមប្រមូលមូលនិធិ​ តាមរយៈប្រព័ន្ធផ្សព្វផ្សាយ​កាលពី​យប់ថ្ងៃព្រហស្បតិ៍ នៅអំឡុងបើករដូវកាលការប្រកួត​បាល់ទាត់ National Football League។ ចំណែកឯ​អតីត​ប្រធានាធិបតី​អាមេរិក នៅពីក្រោយយុទ្ធនាការ​នេះមាន លោក Barack Obama, លោក George W. Bush, លោក Bill Clinton, លោក George H.W. Bush និងលោក Jimmy Carter ហើយមូលនិធិ​ដែលប្រមូលបាន​ នឹងត្រូវផ្ដល់មូលនិធិដែល​ធ្វើការពាក់ព័ន្ធ​នឹង ការជួសជុលការខូចខាត​ ដោយផ្ដោតសំខាន់លើ​ទីក្រុង ហួស្តុន (Houston) ខណៈការ​កសាងរដ្ឋ Texas ឡើងវិញត្រូវបាន​គេប៉ាន់ប្រមាណថា អាចនឹងចំណាយប្រាក់​អស់ ៤៤លានដុល្លារអាមរិក។

គួរបញ្ជាក់ថា ខ្យល់ព្យុះ Hurricane Harvey ដែលបានវាយប្រហារ​​មកលើរដ្ឋតិចសាស់​កាលពី​ថ្ងៃទី២៥ ខែសីហា គឺជាព្យុះ​ដ៏អាក្រក់​បំផុតនៅ​ក្នុងប្រវត្តិសាស្ត្រ​អាមេរិក អស់រយៈពេល ៥០ឆ្នាំមកនេះ ដោយវាបានសម្លាប់​មនុស្សជាង ៦០នាក់ បង្ខំឱ្យ​អាជ្ញាធរជម្លៀសមនុស្សជាង ១លាននាក់ ទៅកាន់កន្លែងមាន​សុវត្ថិភាព ខណៈផ្ទះជាង ២០៣,០០០ខ្នង ត្រូវបាន​បំផ្លាញ៕