(ម៉ុងហ្គោលី)៖ នាយករដ្ឋមន្រ្តីម៉ុងហ្គោលីលោក ចាហ្គាល់ទូលហ្គីន អឺដេនេបាត់ (Jargaltulgyn Erdenebat) នាថ្ងៃព្រហស្បតិ៍នេះ ត្រូវបានសភានៃប្រទេសរបស់លោក សម្រេចដកចេញពីតំណែង នៅក្នុងកិច្ចប្រជុំពិសេសមួយ ហើយប្រការនេះ ក៏បានរំលាយរដ្ឋាភិបាលម៉ុងហ្គោលី ចោលទាំងស្រុងទៅជាមួយគ្នាផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅយប់ថ្ងៃព្រហស្បតិ៍ ទី០៧ ខែកញ្ញា ឆ្នាំ២០១៧។
គួរបញ្ជាក់ថា លោក Erdenebat ស្ថិតក្នុងវ័យ៤៤ឆ្នាំ គឺជាសមាជិកនៃគណបក្សប្រជាជនម៉ុងហ្គោលី និងបានឡើងកាន់តួនាទីជានាយករដ្ឋមន្រ្តីនៃប្រទេសអាស៊ីខាងកើតមួយនេះ កាលពីថ្ងៃទី០៧ ខែកក្កដា ឆ្នាំ២០១៦។ ដោយឡែកភ្លាមៗបែបនេះ គេពុំទាន់បានជ្រាបថា ការដកតំណែងរបស់លោក ត្រូវបានធ្វើឡើង ដោយសារតែមូលហេតុអ្វីនៅឡើយទេ៕
