(រ៉ង់ហ្គូន)៖ អ្នករាយការណ៍​ពិសេសអង្គការសហប្រជាជាតិ​ ទទួលបន្ទុកសិទ្ធិមនុស្ស​ប្រចាំប្រទេស​មីយ៉ាន់ម៉ា លោកស្រី យ៉ាងហ៊ី លី (Yanghee Lee) បាននិយាយថា ចំនួនអ្នកស្លាប់នៅក្នុង​អំពើហិង្សាជម្លោះ ជាតិសាសន៍រវាងជនជាតិដើមភាគតិច​មូស្លីមរ៉ូហ៊ីងយ៉ា និងកម្លាំងយោធាមីយ៉ាន់ម៉ា គិតចាប់តាំងពីថ្ងៃទី២៥ ខែសីហា មកបានកើនដល់ខ្ទង់១,០០០នាក់ ហើយ ខណៈមនុស្សជាង ២០,០០០នាក់ផ្សេងទៀតកំពុង​ជាប់គាំងនៅព្រំដែន​បង់ក្លាដែស។ នេះបើតាមការ​ចេញផ្សាយដោយ​សារព័ត៌មានរុស្ស៊ី Sputnik នៅរសៀលថ្ងៃអង្គារ ទី០៥ ខែកញ្ញា ឆ្នាំ២០១៧។

យោងតាម លោកស្រី Yanghee Lee មនុស្ស ២០,០០០នាក់ ដែលព្យាមយាម​រត់​ចេញពី​ជម្លោះ​ កំពុងជាប់គាំងនៅតំបន់​ព្រំដែនបង់ក្លាដែស ហើយបើគិតជា​សរុបមនុស្សដល់ទៅ ៥០,០០០នាក់ បានរត់ភៀសខ្លួន​ឆ្លងកាត់ព្រំដែន ហើយដោយឡែក ៣០,០០០នាក់ បានទៅដល់គោលដៅរបស់ពួកគេ។ លោកស្រី Lee បានបញ្ជាក់យ៉ាងដូច្នេះថា «ខ្ញុំត្រូវបានគេ​ជូនដំណឹងថា មានមនុស្ស ៣០,០០០នាក់ បានទៅដល់ប្រទេស​បង់ក្លាដែស រីឯ ២០,០០០នាក់ កំពុងជាប់គាំង​នៅតំបន់ព្រំដែន»។

បន្ថែមពីលើនេះលោកស្រី ក៏បានរិះគន់យ៉ាងខ្លាំង​លើយោធាមីយ៉ាន់ម៉ា និងជ័យលាភីភាពពានរង្វាន់​ណូបែល​សន្តិភាពលោកស្រី អោងសាន ស៊ូជី ផងដែរ សម្រាប់ការបរាជ័យ​ក្នុងការការពារជនជាតិដើមភាគតិចមូស្លីមរ៉ូហ៊ីងយ៉ា។ តែទោះជាយ៉ាងនេះក្ដី លោកស្រីនៅតែអះអាងថា តួរលេខដែល​លោកស្រី​ទទួលបានពិបាក​ នៅក្នុងបញ្ជាក់ឱ្យបានច្បាស់ណាស់ ខណៈសារព័ត៌មានមីយ៉ាន់ម៉ា រាយការណ៍ថាមនុស្ស ៤០០នាក់ ភាគច្រើនជាជនជាតិរ៉ូហ៊ីងយ៉ា​បានស្លាប់ គិតចាប់តាំងពីថ្ងៃទី២៥ ខែសីហាមក។

គួរបញ្ជាក់ថា បច្ចុប្បន្នជនជាតិដើមភាគតិច​មូស្លីមរ៉ូហ៊ីងយ៉ាជាង ១.៥លាននាក់ បានតាំងទីលំនៅ​ក្នុងរដ្ឋ រ៉ាឃីន (Rakhine) អស់រយៈពេលរាប់​ទសវត្សរ៍ តែមិនត្រូវបានទទួល​ស្គាល់ជាពលរដ្ឋ​មីយ៉ាន់ម៉ា​ឡើយ។ អំពើហិង្សារវាង​កម្លាំង​រដ្ឋាភិបាល មីយ៉ាន់ម៉ា និងរ៉ូហ៊ីងយ៉ាបានផ្ទុះឡើងខ្លាំង​តាំងតែពីឆ្នាំ២០១៦ មកម្ល៉េះ ហើយមកទល់ពេល​នេះកុំថា​ឡើយលោកស្រី ស៊ូជី សូម្បីតែ​អង្គការសហប្រជាជាតិ ក៏ពុំទាន់អាចដោះស្រាយ​ជម្លោះជាតិ​សាសន៍ដ៏រុំារ៉ៃនេះបានដែរ៕