(សេអ៊ូល)៖ ទីភ្នាក់ងារស៊ើបការណ៍​សំងាត់​កូរ៉េខាងត្បូង នៅថ្ងៃចន្ទនេះ​បាននិយាយថា កូរ៉េខាងជើង ទំនងជាអាចនឹង​បាញ់មីស៊ីល​ឆ្លងទ្វីប ICBM ឆ្ពោះទៅកាន់តំបន់​ប៉ាស៊ីហ្វិកខាងជើង បន្ទាប់ពី​ទីក្រុងព្យុងយ៉ាង បំផ្ទុះក្បាលគ្រាប់​នុយក្លេអ៊ែរ​ជាលើកទី០៦។ នេះបើតាមការ​ចេញផ្សាយដោយ ទីភ្នាក់ងារសារព័ត៌មាន​យ៉ុនហាប់ នៅរសៀលថ្ងៃចន្ទ ទី០៤ ខែកញ្ញា ឆ្នាំ២០១៧។

ថ្លែងប្រាប់ក្រុម​សមាជិកសភា ទីភ្នាក់ស៊ើបការណ៍សំងាត់ជាតិ (NIS) បានគូសបញ្ជាក់យ៉ាងដូច្នេះថា «វាមានលទ្ធភាព​ខ្ពស់ណាស់ថា កូរ៉េខាងជើង​កំពុងរៀបចំ និងបាញ់សាកល្បង​មីស៊ីល ICBM ឆ្ពោះ​ទៅកាន់តំបន់​ប៉ាស៊ីហ្វិក​ខាងជើង ក្នុងពេល​ឆាប់ៗនេះ ខណៈយើងត្រូវការ​ពេលវេលាបន្ថែម ដើម្បីបញ្ជាក់ឱ្យបានច្បាស់​ថា ការធ្វើតេស្ដ​អាវុធនុយក្លេអែរ​កាលពីថ្ងៃអាទិត្យ របស់​កូរ៉េខាងជើង គឺជា​ការធ្វើតេស្ដគ្រាប់បែក​អេឡិចត្រូម៉ាញេទិច ឬក៏គ្រាប់បែក​អ៊ីដ្រូសែន»។

គួរបញ្ជាក់ថា កូរ៉ខាងជើងបាន​អះអាងថា ខ្លួនបានធ្វើតេស្ដបំផ្ទុះក្បាល​គ្រាប់នុយក្លេអ៊ែរ-អ៊ីដ្រូសែន ដោយជោគជ័យ​សម្រាប់បំពាក់លើគ្រាប់មីស៊ីល​ឆ្លងទ្វីប ICBM ដែលអ្នកជំនាញខ្លះថាអាច បាញ់ដល់ដីគោក​របស់សហរដ្ឋអាមេរិក។ ការធ្វើតេស្តលើកនេះ គឺទាក់ទាញការថ្កោលទោស និងរិះគន់យ៉ាងកក្រើកពិភពលោកតែម្តង ទាំងប្រទេសខ្លះដែលមិនធ្លាប់បង្ហាញ​មតិយោបល់អ្វីសោះកន្លងមក ក៏បានលេចមុខមកព្រមានពីសកម្មភាពដ៏គគ្លើនរបស់កូរ៉េខាងជើង លើកនេះដែរ៕