(យូអិន)៖ ក្រុមប្រឹក្សាសន្តិសុខនៃអង្គការសហប្រជាជាតិ គួរតែដាក់ចេញនូវក្របខណ្ឌការទូតដ៏ច្បាស់លាស់មួយ សម្រាប់ឲ្យគ្រប់ភាគីពាក់ព័ន្ធទាំងអស់ អាចធ្វើការចរចាស្វែងរកដំណោះស្រាយ ចំពោះវិបត្តិនុយក្លេអ៊ែរកូរ៉េខាងជើង។ នេះបើតាមការលើកឡើងរបស់អគ្គរដ្ឋទូតរុស្ស៊ីប្រចាំ UN ដកស្រង់ដោយសារព័ត៌មានរុស្ស៊ី Sputnik នៅរសៀលថ្ងៃសៅរ៍ ទី០២ ខែកញ្ញា ឆ្នាំ២០១៧។
ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ លោក វ៉ាស៊ីលី ណេប៊ិនស្យ៉ា (Vassily Nebenzya) បានថ្លែងថា «យើងចង់ឲ្យក្រុមប្រឹក្សាសន្តិសុខ UN ដាក់ចេញសេចក្តីសម្រេចមួយ ស្តីពីកូរ៉េខាងជើង ដែលផ្តល់នូវការណែនាំដ៏ច្បាស់លាស់ ពាក់ព័ន្ធនឹងវិធីសាស្រ្តនៃការដោះស្រាយវិបត្តិ នៅតំបន់ឧបទ្វីបកូរ៉េ ហើយសេចក្តីសម្រេចនេះទៀតសោត គួរតែគ្រោងទុកជាមុននូវជំហានផ្សេងៗ ដើម្បីនាំយករាល់ភាគីពាក់ព័ន្ធ ទៅកាន់តុចរចា»។
លោក Vassily Nebenzya បានគូសបញ្ជាក់ថា វាមិនទាន់គ្រប់គ្រាន់នោះឡើយចំពោះ ការដែលក្រុមប្រឹក្សាសន្តិសុខត្រឹមតែកត់ចំណាំនូវស្ថានការណ៍បច្ចុប្បន្ន ហើយបង្ហាញពីក្តីបំណងចង់បានលទ្ធផលវិជ្ជមានប្រកបដោយសន្តិភាពនោះ។ បើតាមលោក Nevenzia សេចក្តីសម្រេចដែលលោកចង់បាន គឺជាគម្រោងសកម្មភាពសំដៅឆ្ពោះទៅរកការសម្រេចឲ្យបាននូវរឿងជាក់លាក់អ្វីមួយ។
ជាចុងក្រោយ លោកឯកអគ្គរដ្ឋទូតរុស្ស៊ី បានធ្វើការសង្កត់ធ្ងន់ថា ការដាក់ទណ្ឌកម្មបន្ថែមទៀត ដូចដែលបានលើកឡើងដោយសមាជិកខ្លះរបស់ UNSC នោះ នឹងមិនជួយបន្ធូរបន្ថយភាពតានតឹងនៃស្ថានការណ៍បច្ចុប្បន្ននោះឡើយ។ ផ្ទុយទៅវិញ ការដែលកូរ៉េខាងជើង បានសម្រេចជ្រើសរើស បាញ់មីស៊ីលប៉ុន្មានគ្រាប់ ក្រោយពីការដាក់ទណ្ឌកម្មថ្មីចុងក្រោយបំផុតកាលពីពេលថ្មីៗនេះ របស់ក្រុមប្រឹក្សាសន្តិសុខប្រឆាំងទៅលើទីក្រុងព្យុងយ៉ាង បានស្តែងឲ្យឃើញយ៉ាងច្បាស់ថា វិធានការទាំងនេះពុំមានឥទ្ធិពលក៏ដូចជាសារៈប្រយោជន៍ទៀតឡើយ៕
