(សេអ៊ូល)៖ សហរដ្ឋអាមេរិក​បានបញ្ជូនយន្ដហោះ​ទម្លាក់គ្រាប់បែក​យុទ្ធសាស្ត្រធុន B-1B ចំនួន ០២គ្រឿង រួមទាំងយន្ដហោះប្រដេញ F-35B ០៤គ្រឿង ទៅហោះឆ្វែលពីលើ​ឧបទ្វីបកូរ៉េជាសារ ព្រមានផ្ញើ​ជូនទីក្រុងព្យុងយ៉ាង សម្រាប់ការបាញ់​សាកល្បងមីស៊ីល​ផ្លោងរយៈចំងាយមធ្យម Hwasong-12 ហោះរំលងប្រទេសជប៉ុនកាលពីថ្ងៃអង្គារ។ នេះបើតាមការ​ចេញផ្សាយដោយ​ទីភ្នាក់ងារសារព័ត៌មាន យ៉ុនហាប់ នៅល្ងាចថ្ងៃសុក្រ ទី០១ ខែកញ្ញា ឆ្នាំ២០១៧។

យោងតាមយោធា​កូរ៉េខាងត្បូង កងយន្ដហោះ​ទម្លាក់គ្រាប់បែក B-1B និង​យន្ដហោះ F-35B បានដឹកនាំ​ការធ្វើសមយុទ្ធយោធា​ហោះហើររួមគ្នា ជាមួយកងទ័ព​កូរ៉េខាងត្បូង ក៏ដូចជាបណ្ដោះ បណ្ដាលពីរ​បៀបទម្លាក់គ្រាប់បែក​លើគោលដៅសត្រូវ នៅឯទីលាន​ហ្វឹកហាត់ ភីលសឿង (Pilseung) នៃខេត្ត កាងវ៉ុន (Gangwon)។ យោធាកូរ៉េខាងត្បូង ក៏បានបញ្ជាក់​ដែរថា យន្ដហោះ B-1B មកពីមូលដ្ឋាន ទ័ពអាមេរិក​នៅលើកោះហ្គាំ រីឯយន្ដហោះ F-35B មកពីមូលដ្ឋាន​ទ័ពជើងទឹក​អាមេរិកក្នុង​ប្រទេសជប៉ុន។

គួរបញ្ជាក់ថា បើតាមយ៉ុនហាប់ កូរ៉េខាងត្បូង និងសហរដ្ឋអាមេរិកនឹង​បញ្ចប់ការធ្វើ​សមយុទ្ធ​យោធា​រួមគ្នា​ទ្រង់ទ្រាយធំ​​ប្រចាំឆ្នាំ តាមការ​គ្រោងទុក​​នៅថ្ងៃព្រហស្បតិ៍នេះ។ សមយុទ្ធយោធា​ប្រចាំ​ឆ្នាំ​ឈ្មោះ Ulchi Freedom Guardian (UFG) បានចាប់ផ្ដើមតាំង​តែពីថ្ងៃទី២១ ខែសីហា ដោយមាន​ការចូលរួមពីកងទ័ព​អាមេរិក ១៧,៥០០នាក់ និងកូរ៉េខាងត្បូង​ច្រើនជាង ៥០,០០០នាក់ រួមទាំង ៣,០០០នាក់ ផ្សេងទៀតមកពី​មូលដ្ឋានទ័ព​បរទេស។ ចំណែកឯ​​បណ្ដារដ្ឋ​ចំនួន ០៧ មានដូចជា អូស្ត្រាលី កាណាដា កូឡុំប៊ី ដាណឺម៉ាក នូវែលសេឡង់ ហូឡង់ និងអង់គ្លេស ក៏បាន​ចូលរួម​នៅក្នុង​សមយុទ្ធយោធា​​នេះដែរ៕