(អាល្លឺម៉ង់)៖ ប្រជាជនជាអាល្លឺម៉ង់រហូតដល់ទៅ ៧០,០០០នាក់ ត្រូវបានអាជ្ញាធរគ្រោងជម្លៀសចេញពី​ទីក្រុង ហ្វ្រេងហ្វឺត (Frankfurt) ភាគនិរតីប្រទេស បន្ទាប់ពីក្រុមជំនាញបានប្រទះឃើញ គ្រាប់បែកចំនួនមួយគ្រាប់ សល់ពីសម័យសង្រ្គាមលោកលើកទី០២ ដែលមានរហស្សនាមថា «blockbuster» នៅក្នុងដី នៃទីលានការដ្ឋានមួយកន្លែង។ នេះបើ​តាមការចេញផ្សាយនៅមុននេះបន្តិច ដោយសារព័ត៌មាន The Guardian នារសៀលថ្ងៃព្រហស្បតិ៍ ទី៣១ ខែសីហា ឆ្នាំ២០១៧។

សារព័ត៌មានបាន​ចេញផ្សាយ​បន្តទៀតថា ការជម្លៀសមនុស្ស​បែបនេះ នឹងគ្រោងធ្វើឡើងនៅថ្ងៃអាទិត្យ​ចុងសប្តាហ៍នេះតែម្តង ដែលវាជាបេសកកម្មធំ​បំផុតមិនធ្លាប់កើតមាន​នោះឡើយ។ គ្រាប់បែក​​ខាងលើ​នេះ ត្រូវបានក្រុមជំនាញ​អះអាងថា ជារបស់ចក្រភព​អង់គ្លេស ដែលមាន​ទម្ងន់ ១,៤០០គីឡូក្រាម ដែលវាមាន​លទ្ធភាពអាចកម្ទេចផ្លូវ ឬអគារជាច្រើនឲ្យរាបដល់ដីតែម្តង។ បច្ចុប្បន្នគ្រាប់បែកនេះកំពុងស្ថិតនៅក្បែរដងវិថី វីសម៉ារើ (Wishmarer) ដែលមានចម្ងាយ ២.៥គីឡូម៉ែត្រ​ពីចំណុចកណ្តាលនៃទីក្រុង Franfurt។

គួរបញ្ជាក់ថា គ្រាប់បែក blockbuster ត្រូវបានប្រទះឃើញ​កាលពីថ្ងៃអង្គារ​សប្តាហ៍នេះ អំឡុងពេល​នៃការដ្ឋានសំណង់​មួយ កំពុងតែដំណើរការ​សកម្មភាពរបស់ខ្លួន។ ប៉ូលិស និងក្រុមជំនាញ​​ត្រូវបានដា​​ពង្រាយ​ជាបណ្តោះអាសន្ន​នៅទីតាំងនោះ ហើយបច្ចុប្បន្ននេះ​វាមិនបានបង្កគ្រោះថ្នាក់​អ្វីឡើយ។ ប៉ូលិសបាន​អះអាងថា ដោយសារគ្រាប់បែកខាង​លើនេះធំពេក ដូច្នេះមុននឹងយកវា​ចេញពីទីតាំងនោះ អាជ្ញាធរត្រូវតែជម្លៀស​ប្រជាជន​ជុំវិញ​នោះ ចេញទាំងអស់ជាមុនសិន៕