(ម៉ុមបៃ)៖ អគារស្នាក់នៅដ៏ចំណាស់មួយ នៅតាមដងវិថី ផាកម៉ូឌា (Pakmodia) នៃទីក្រុងម៉ុមបៃ ដ៏ធំប្រទេសឥណ្ឌាបានរលំចុះមក បណ្តាលឲ្យមានការភ័យស្លន់ស្លោ ខណៈសមត្ថកិច្ចនៅទីនោះបានបញ្ជាក់ថា មនុស្សយ៉ាងហោចណាស់ ៤០នាក់ កំពុងជាប់ខ្លួននៅក្រោមគំនរបាក់បែក។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅមុននេះបន្តិចនារសៀលថ្ងៃព្រហស្បតិ៍ ទី៣១ ខែសីហា ឆ្នាំ២០១៧។
គួរបញ្ជាក់ថា អគារខាងលើនេះបានរលំកាលពីវេលាម៉ោង ៨៖៣០នាទី ព្រឹកថ្ងៃព្រហស្បតិ៍នេះ ម៉ោងនៅទីក្រុងម៉ុមបៃភាគខាងត្បូងប្រទេសឥណ្ឌា ហើយភ្លាមៗក្រុមសង្គ្រោះដែលមានគ្នាប្រមាណ ៤៥នាក់ ត្រូវបានបញ្ជូនទៅកាន់កន្លែងកើតហេតុ ដែលស្ថិតនៅក្នុងសង្កាត់ ប៊ីនឌី បាហ្សាអា (Bhindi Bazzar)។
សម្រាប់ព័ត៌មានចុងក្រោយបំផុតបានបញ្ជាក់ថា មនុស្សទើបតែម្នាក់ប៉ុណ្ណោះទើបតែត្រូវបានទាញចេញពីគំនរអគារ ដោយរូបគេបានបាត់បង់ជីវិតបាត់ទៅហើយ និង ១០នាក់ទទួលរងរបួស ខណៈក្រុមសង្គ្រោះកំពុងព្យាយាមគាស់កកាយ រកមនុស្សបាត់ខ្លួនបន្ថែមទៀត៕
