(សេអ៊ូល)៖ កូរ៉េខាងត្បូងបានដឹកនាំការធ្វើសមយុទ្ធយោធាទម្លាក់គ្រាប់បែក ភ្លាមៗតែប៉ុន្មានម៉ោងប៉ុណ្ណោះ ក្រោយកូរ៉េខាងជើងបាញ់សាកល្បងមីស៊ីលផ្លោងរយៈចំងាយមធ្យមមួយគ្រាប់ ធ្លាក់ចូលក្នុងដែនទឹកភាគឦសានប្រទេសជប៉ុនតែម្តង។ ព្រមពេលជាមួយគ្នា យោធាកូរ៉េខាងត្បូង ក៏បានគំរាមដែរថា ខ្លួននឹងរួមដៃជាមួយសហរដ្ឋអាមេរិកចាត់វិធានការសងសឹក បើសិនជាទីក្រុងព្យុងយ៉ាងនៅតែ បង្ករឿងរបៀបនេះតទៅទៀត។ នេះបើតាមការចេញផ្សាយដោយសារព័ត៌មាន Russian Today នៅរសៀលថ្ងៃអង្គារ ទី២៩ ខែសីហា ឆ្នាំ២០១៧។
ការធ្វើសមយុទ្ធយោធាបានតែសម្ញែងឬទ្ធិនេះ ធ្វើឡើងនៅក្បែរតំបន់ព្រំដែនអន្តរកូរ៉េនៃទីក្រុង តែបែក (Taebaek) តាមការបង្គាប់បញ្ជារបស់ប្រធានាធិបតី លោក មូន ជែអ៊ីន ដោយមានការចូលរួមពី យន្ដហោះ F15K ០៤គ្រឿង ធ្វើការទម្លាក់គ្រាប់បែក MK84 ០៨គ្រាប់ ដែលមួយគ្រាប់មានទម្ងន់មួយតោន។ នេះបើតាមអ្នកនាំពាក្យវិមានប្រធានាធិបតីកូរ៉េខាងត្បូង លោក យូន យាងចាន់ (Yoon Young-chan)។
លោក Yoon បានបញ្ជាក់ទៀតថា លោក មូន បានបញ្ជាឱ្យធ្វើសមយុទ្ធយោធាទម្លាក់គ្រាប់បែកនេះភ្លាមៗ បន្ទាប់ពីក្រុមប្រឹក្សាសន្តិសុខជាតិ ជួបប្រជុំគ្នាពីលទ្ធភាពចាត់វិធានការឆ្លើយតប ទៅនឹងការបាញ់សាកល្បង មីស៊ីលផ្លោងរបស់កូរ៉េខាងជើង។ ទោះបីជាយ៉ាងនេះក្ដី នេះមិនមែនជាលើកទី១ឡើយ ដែលកូរ៉េខាងត្បូង ធ្វើសមយុទ្ធយោធា និងព្រមានសងសឹកលើកូរ៉េខាងជើង ហើយម្យ៉ាងវិញទៀតបើតាមក្រុមអ្នកជំនាញខ្លះ គឺកូរ៉េខាងត្បូងទៅវិញទេ ដែលជាអ្នកខ្លាចសង្រ្គាមជាមួយកូរ៉េខាងជើងផ្ទុះឡើង ត្បិតបើសង្រ្គាមផ្ទុះឡើងអ្នករងគ្រោះធ្ងន់ធ្ងរ គឺទីក្រុងសេអ៊ូលហ្នឹងហើយ ខណៈកូរ៉េខាងជើងគ្មានសេដ្ឋកិច្ចអ្វីត្រូវខាតបង់ច្រើនឡើយ ព្រោះវាបាន និងកំពុងខាតបង់ខ្លាំងរួចទៅហើយ ដោយសារតែទណ្ឌកម្មរបស់សហគមន៍អន្តរជាតិ។
គួរបញ្ជាក់ថា បើតាមយោធាកូរ៉េខាងត្បូង កូរ៉េខាងជើងបានបាញ់មីស៊ីលផ្លោងរយៈចំងាយមធ្យមមួយគ្រាប់ ចេញពីតំបន់ស៊ូណាន (Sunan) នៃរដ្ឋធានីព្យុងយ៉ាង ឆ្ពោះទៅភាគឦសានកាលពីវេលាម៉ោងប្រមាណ ៥៖៥៧នាទីព្រឹក (ពេលវេលានៅទីក្រុងសេអ៊ូល) ហើយវាបានហោះឆ្លងកាត់ផ្ទៃមេឃពីលើប្រទេសជប៉ុន មុននឹងធ្លាក់ចូលទៅក្នុងភាគខាងត្បូង មហាសាគរប៉ាស៊ីហ្វិក ដោយរត់បានចម្ងាយជាង ២,៧០០គីឡូម៉ែត្រ ក្នុងរយៈកម្ពស់អតិបរមាប្រមាណ ៥៥០គីឡូម៉ែត្រ។ ចំណែកឯ រដ្ឋាភិបាលជប៉ុនក៏បានអះអាងដែរថា មីស៊ីលនេះបាន ហោះឆ្លងកាត់ពីលើតំបន់ភ្នំ ខេប អ៊ីរីម៉ូ (Cape Erimo) ដែលស្ថិតនៅខាងចុងកោះហុកកៃដូ (Hokkaido) ភាគខាងជើងប្រទេសជប៉ុនហើយធ្លាក់ចូលទៅក្នុងដែនទឹកចម្ងាយ
១,១៨០គីឡូម៉ែត្រពីទីនោះ៕
