(វ៉ាស៊ីនតោន)៖ រដ្ឋបាលអាមេរិករបស់លោកប្រធានាធិបតី ដូណាល់ ត្រាំ នឹងដាក់ទណ្ឌកម្មផ្នែកទិដ្ឋការលើប្រទេសចំនួន០៤ ដែលបានបដិសេធទទួលយកពលរដ្ឋរបស់ខ្លួន ដែលរស់នៅដោយខុសច្បាប់នៅសហរដ្ឋអាមេរិក។ ការទណ្ឌកម្មនេះទៀតសោត អាចនឹងផ្ដល់ផលលំបាកដល់ពលរដ្ឋ នៃប្រទេសទាំង០៤ខាងលើ ក្នុងការស្នើសុំទិដ្ឋការដើម្បីជាន់ដីអាមេរិក។ នេះបើតាមការចេញផ្សាយដោយសារព័ត៌មាន CNN នៅថ្ងៃព្រហស្បតិ៍ ទី២៤ ខែសីហា ឆ្នាំ២០១៧។
ជាមួយគ្នានោះដែរ បើតាមក្រសួងសន្តិសុខសហរដ្ឋអាមេរិក ទិដ្ឋាការនេះត្រូវរឹតបន្តឹងលើប្រទេសចំនួនក្នុងនោះមានដូចជា អេរីទ្រា, ហ្គីនៀ, សៀរ៉ា លីអូន និងកម្ពុជា សម្រាប់ការមិនព្រមទទួលយក ឬពន្យាពេល ឬក៏ធ្វើមាតុភូមិវត្តន៍ពលរដ្ឋរបស់ខ្លួន បន្ទាប់ពីសហរដ្ឋអាមេរិកព្យាយាមបណ្ដេញពួកគេចេញពីប្រទេស ក្រោមហេតុផលពួកគេបានប្រព្រឹត្តបទឧក្រិដ្ឋ ឬរស់នៅដោយខុសច្បាប់។ ក្រសួងដដែលនេះបានបន្តទៀតថា ព័ត៌មានជុំវិញការដាក់ទណ្ឌកម្មទិដ្ឋាការនេះ កើតមានឡើងកាលពីសប្ដាហ៍មុន នៅក្នុងលិខិតមួយដែលក្រសួងបានផ្ញើទៅឲ្យក្រសួងការបរទេស ដែលនឹងត្រូវសម្រេចចិត្តទៅតាមដំណាក់កាលនីមួយៗ។
គួររំលឹកថា កាលពីខែសីហា ឆ្នាំ២០១៦ ថ្លែងនៅក្នុងសុន្ទរកថាលោក ដូណាល់ ត្រាំ បានលើកឡើងថាមានប្រទេសចំនួន២៣ បានបដិសេធទទួលយកពលរដ្ឋ របស់ពួកគេវិញ ក្រោយ ពួកគេទំាងនេះ ក្នុងនោះមានឧក្រិដ្ឋជន ក្នុងចំនួនដ៏ច្រើន ត្រូវបានបង្គាប់ឱ្យចេញពីសហរដ្ឋអាមេរិក៕
