(វ៉ាស៊ីនតោន)៖ អតីតភ្នាក់ងារចារកិច្ច CIA របស់សហរដ្ឋអាមេរិក លោកស្រី វ៉ាឡឺរី ផ្លាម វីលសុន (Valerie Plame Wilson) បានចាប់ផ្តើមយុទ្ធនាការរៃអង្គាសប្រាក់ ហ្គោហ្វាន់មី (GoFundMe) ក្នុងគោលបំណងទិញយកភាគហ៊ុនគ្រប់គ្រងលើប្រព័ន្ធបណ្តាញទំនាក់ទំនងសង្គម Twitter ដើម្បីអាចបិទមាត់ប្រធានាធិបតីអាមេរិក លោក ដូណាល់ ត្រាំ លែងឲ្យបង្ហោះសារតាមតែអំពើចិត្តទៀត។ នេះបើតាមការចេញផ្សាយដោយសារព័ត៌មានរុស្ស៊ី Sputnik នៅព្រឹកថ្ងៃពុធ ទី២៣ ខែសីហា ឆ្នាំ២០១៧។
នៅក្នុងសារដើម្បីរៃអង្គាសប្រាក់ ០១ពាន់លានដុល្លារ លោកស្រី Wilson បានលើកឡើងថា «លោក ដូណាល់ ត្រាំ បានធ្វើរឿងអាក្រក់ៗជាច្រើននៅលើ Twitter។ រាប់ចាប់ពីការលើកតម្កើន ក៏ដូចជាជំរុញលើកទឹកចិត្តក្រុមស្បែកសជ្រុលនិយម រហូតដល់ការលើកកម្ពស់ឲ្យមានអំពើហិង្សា ប្រឆាំងនឹងអ្នកសារព័ត៌មាន។ សាររបស់លោកបាននិងកំពុងបំផ្លិចបំផ្លាញសហរដ្ឋអាមេរិក និងធ្វើឲ្យប្រជាពលរដ្ឋអាមេរិកស្ថិតនៅមាត់ជ្រោះគ្រោះថ្នាក់។ ម៉្យាងវិញទៀត ការគំរាមធ្វើសង្រ្គាមនុយក្លេអ៊ែរជាមួយប្រទេសកូរ៉េខាងជើង កាន់តែធ្វើឲ្យទង្វើរបស់លោក ត្រាំ នៅលើបណ្តាញសង្គមនេះគ្រោះថ្នាក់ជាងមុនទ្វេដង»។
អតីតភ្នាក់ងារចារកិច្ចរូបនេះបានបន្តថា «ការប្រើប្រាស់បណ្តាញទំនាក់ទំនងសង្គមដ៏ធំនេះ ជះផលប៉ះពាល់ដល់ពិភពជាក់ស្តែងខាងក្រៅ ដោយការបង្ហោះសារលើ Twitter តែមួយប៉ុណ្ណោះ លោក ត្រាំ អាចបំផ្លាញទំនាក់ទំនងអន្តរជាតិ និងសម្ព័ន្ធភាពនានា ឬក៏ធ្វើឲ្យទីផ្សារភាគហ៊ុនដាំក្បាលចុះ ឬលោតឡើងវិញបាន។ ពិតណាស់ក្នុងនាមជាប្រធានាធិបតីសហរដ្ឋអាមេរិក លោកអាចធ្វើរឿងទាំងអស់នេះបានដោយពុំចាំបាច់ប្រើ Twitter ក៏ប៉ុន្តែវាប្រហែលជាធ្វើឲ្យមនុស្សមួយចំនួន មានអារម្មណ៍ធូរស្រាលជាងមុន នៅពេលរូបលោកធ្វើយ៉ាងដូច្នោះ ដោយមិនបើកចំហពេក ឬប្រកាសស្តែងៗបែបនេះនោះ»។
យ៉ាងណាមិញ យុទ្ធនាការរបស់លោកស្រី Wilson ដូចជាពុំសូវទទួលបានជោគជ័យប៉ុន្មានឡើយ ដោយក្នុងពេល ០៦ថ្ងៃមកនេះ ទើបរៃអង្គាសបានប្រាប់ជាងបីពាន់ដុល្លារប៉ុណ្ណោះ។ ដោយឡែកយុទ្ធនាការ GoFundMes នេះនឹងបន្តប្រព្រឹត្តទៅរហូតតាមតែលោកស្រីចង់ ដូច្នេះហើយប្រសិនបើអត្រារៃអង្គាសប្រាក់នៅតែថេរដូច្នេះរហូតនោះ ប្រាក់ ០១ពាន់លានដុល្លារ របស់លោកស្រី នឹងលេចចេញជារូបរាងនៅឆ្នាំ៧៤៩៦៕
