(ប៉េកាំង)៖ ក្រុមអវកាសយានិក​ចិន ១៦រូប រួមទាំងអឺរ៉ុប ០២រូប បានបញ្ចប់​ជាស្ថាពរហើយ នូវការហ្វឹកហាត់​ការរស់រាន​នៅលើផ្ទៃសមុទ្រ នៅក្បែរទីក្រុង យ៉ានតៃ (Yantai) ក្នុងខេត្ត សានទុង (Shandong) ភាគខាងកើតប្រទេសចិន។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នៅរសៀលថ្ងៃអង្គារ ទី២២ ខែសីហា ឆ្នាំ២០១៧។

កម្មវិធីរួម​រយៈពេល ១៧ថ្ងៃនេះ គឺជាលើកដំបូងបំផុត​សម្រាប់​អវកាសយានិក​ចិន ក្នុងការអនុវត្តន៍​ការហ្វឹកហាត់​បែបនេះ នៅលើ​ផ្ទៃសមុទ្រ។ រៀបចំដោយ​​មជ្ឈ​មណ្ឌល​​អវកាសយានិកចិន ACC កម្មវិធីនេះ​ត្រូវបានរចនាឡើង​ដើម្បីជួយត្រៀម​លក្ខណៈ ចំពោះក្រុមអវកាសយានិក​ជាមួយជំនាញ​ និង​ភាព​ប៉ិន​ប្រសព្វ​ផ្សេងៗ រួម​មាន​ទាំង​ការចាកចេញ​ពីយាន ខេបស៊ុល (Capsule) ដោយខ្លួនឯង, ការរស់រាន​នៅលើផ្ទៃសមុទ្រ​ដ៏ធំល្វឹងល្វើយ, និងការជួយ​សង្រ្គោះ​ជាដើម។

គួរបញ្ជាក់ថា ប្រទេសចិន​បានចុះកិច្ចព្រមព្រៀង​សហប្រតិបត្តិការ​ជាច្រើន ជាមួយប្រទេស​ដូចជា រុស្ស៊ី អាល្លឺម៉ង់ បារាំង និងអង្គការ​ដទៃៗទៀត ដូចជាទីភ្នាក់ងារ​​អវកាសអឺរ៉ុប ESA រួមទាំង​ការិយាល័យ UN សម្រាប់កិច្ចការ​អវកាសជាដើម។ សម្រាប់ទីភ្នាក់ងារអវកាសចិន គឺបាន និងកំពុងខិតខំប្រឹងប្រែងយ៉ាងខ្លាំង​នៅក្នុងការទៅស្រាវជ្រាវនៅទីអវកាស និងចុះត្រឡប់មកផែនដីវិញដោយសុវត្ថិភាព៕