(សេអ៊ូល)៖ ប្រធានាធិបតីកូរ៉េខាងត្បូង លោក មូន ជែអ៊ីន នឹងជួបសមភាគីរុស្ស៊ី លោក វ្ល៉ាឌីមៀ ពូទីន នៅខែកញ្ញាខាងមុខនេះ ក្នុងឱកាសបំពេញដំណើរទស្សនកិច្ចចូលរួមកិច្ចប្រជុំ នៃវេទិកាសេដ្ឋកិច្ច Eastern Economic Forum (EEF) ក្នុងទីក្រុង វ្ល៉ាឌីវ៉ូស្តូក (Vladivostok) ប្រទេសរុស្ស៊ី ជាពិសេសកូរ៉េខាងត្បូងនឹងមានឱកាសពិភាក្សាជាមួយរុស្ស៊ីរឿងកូរ៉េខាងជើង ខណៈដែលទីក្រុងម៉ូស្គូ និងព្យុងយ៉ាងត្រូវបានអន្តរជាតិមើលឃើញថា ដូចជាជិតស្និទ្ធនឹងគ្នាជាងមុន ក្រោយចិនបានដាក់ទណ្ឌកម្មកាន់តែច្រើន លើកូរ៉េខាងជើងនោះ។ នេះបើតាមសេចក្តីថ្លែងការណ៍ ពីវិមានប្រធានាធិបតីកូរ៉េខាងត្បូង ដកស្រង់ដោយសារព័ត៌មាន Sputnik នៅរសៀលថ្ងៃអង្គារ ទី២២ ខែសីហា ឆ្នាំ២០១៧។
វិមានប្រធានាធិបតីកូរ៉េខាងត្បូង បានបញ្ជាក់នៅក្នុងសេចក្ដីថ្លែងការណ៍របស់ខ្លួនយ៉ាងដូច្នេះថា «លោកប្រធានាធិបតី មូន មានគំរោងជួបពិភាក្សាការងារជាមួយប្រធានាធិបតីរុស្ស៊ី លោក វ្ល៉ាឌីមៀ ពូទីន នៅក្នុងជំនួបកំពូលរុស្ស៊ី-កូរ៉េខាងត្បូង នៅអំឡុងដំណើរទស្សនកិច្ចរបស់លោក»។ វេទិកាសេដ្ឋកិច្ចប្រចាំឆ្នាំ EEF ត្រូវបានបង្កើតឡើងកាលពីឆ្នាំ២០១៥ ក្នុងគោលបំណងពង្រឹងកិច្ចសហប្រតិបត្តិការផ្នែកពាណិជ្ជកម្ម និងនយោបាយរវាងទីក្រុងម៉ូស្គូ និងបណ្ដាប្រទេសមកពីតំបន់អាស៊ីប៉ាស៊ីហ្វិក។
ដោយឡែក EEF នៅក្នុងឆ្នាំ២០១៧នេះ នឹងត្រូវប្រព្រឹត្តទៅពីថ្ងៃទី០៦ ដល់ថ្ងៃទី០៧ ខែកញ្ញា នៅឯទីក្រុង Vladivostok ហើយបើតាមក្រុមមន្រ្តីកូរ៉េខាងត្បូង ជំនួបរបស់មេដឹកនាំទាំងពីរត្រូវបានគេរំពឹងថា នឹងក្លាយជាឱកាសមួយសម្រាប់ លោក មូន ពិភាក្សាពីកិច្ចការតំបន់ជាមួយ លោក ពូទីន ជាពិសេសគឺការស្វែងរកការគំាទ្រពីរុស្ស៊ី សំដៅដោះស្រាយបញ្ហាកម្មវិធីនុយក្លេអ៊ែរ និងមីស៊ីលផ្លោងកូរ៉េខាងជើង៕
