(អាមេរិក)៖ សូរ្យគ្រាសនៅសហរដ្ឋអាមេរិក គឺជារឿងប្រវត្តិសាស្ត្រថ្មីមួយ នៅថ្ងៃចន្ទ ទី២១ ខែសីហា ឆ្នាំ២០១៧ ដែលប្រជាជនទូទាំងប្រទេសជាង ៣២៣លាននាក់ អាចមើលឃើញជាពិសេសសម្រាប់បណ្តារដ្ឋភាគកណ្តាល ដែលសន្ធឹងពីចុងខាងកើតនៅភាគខាងលិច គឺអាចនឹងមើលឃើញបាតុភូតនេះ ពេញលេញជាងទីណាៗទាំងអស់។ នេះបើតាមការចេញផ្សាយដោយទីភ្នាក់ងារព័ត៌មានចិន ស៊ីនហួរ នាព្រឹកថ្ងៃអង្គារ ទី២២ ខែសីហា ឆ្នាំ២០១៧។
ជាលើកដំបូងក្នុងរយៈពេលជិត ៤០ឆ្នាំ បាតុភូតសូរ្យគ្រាសទាំងស្រុង បានកើតមានឡើងនៅលើទឹកដីសហរដ្ឋអាមេរិក។ ចាប់តាំងពីរដ្ឋ អូរ៉េហ្គន (Oregon) ភាគខាងលិចប្រទេស ឆ្ពោះទៅកាន់រដ្ឋ សោត ខារ៉ូលីណា (South Carolina) ភាគខាងកើត រួមទាំងរដ្ឋចំនួន ១២ ផ្សេងទៀតនៅចន្លោះនោះ ព្រះច័ន្ទបានធ្វើដំណើរគោចរ ទៅបាំងពន្លឺទាំងស្រុងរបស់ព្រះអាទិត្យ ខណៈព្រឹត្តិការណ៍តារាសាស្រ្តដ៏អស្ចារ្យបានធ្វើឲ្យមនុស្សជាច្រើនមានភាពរភើបជាខ្លាំង ខណៈមួយចំនួនទៀតមិនរីករាយចំពោះបាតុភូតនេះឡើយ។
ភ្ញៀវទេសចរយ៉ាងច្រើនកុះករបានប្រមូលផ្តុំគ្នា ទៅកាន់កន្លែងដូចជាទីក្រុង សាឡេម (Salem) រដ្ឋ Oregon (ជាទីសូរ្យគ្រាសចាប់ផ្តើម) និងទីក្រុង ឆាឡេស្តុន (Charleston) រដ្ឋ South Carolina (ជាទីសូរ្យគ្រាសចាកចេញទៅកាន់ មហាសាគរអាត្លង់ទិក) ដើម្បីធ្វើការទស្សនាបាតុភូតតារាសាស្រ្តនេះ។ ជុំវិញការទន្ទឹងរង់ចាំមើលសូរ្យគ្រាសនេះ មានសេចក្តីរាយការណ៍ព័ត៌មានជាច្រើនស្តីពីវ៉ែនតាសម្រាប់មើលសូរ្យគ្រាស ដែលគ្មានគុណភាព ខណៈក្រុមហ៊ុនអាមេរិកមួយចំនួនបានប្រកាសថា ខ្លួនខាតបង់ ៧០០លានដុល្លារ ដោយសារតែបុគ្គលិកនាំគ្នាទៅមើលសូរ្យគ្រាស៕
