(វ៉ាស៊ីនតោន)៖ ពាក្យសម្តីប្រធានាធិបតីអាមេរិក លោក ដូណាល់ ត្រាំ មួយឃ្លាថា «ពុំអាចធានាបានទាំងស្រុងថា នឹងមិនជ្រើសរើសប្រើសកម្មភាពយោធា ប្រឆាំងនឹងប្រធានាធិបតីវេណេស៊ុយអេឡា» កំពុងតែបង្កភាពរង្គោះរង្គើរជាខ្លាំង ពីសំណាក់រដ្ឋាភិបាលប្រទេសអាមេរិកឡាទីន ក៏ព្រោះស្ថានភាពនេះ វាមិនខុសអ្វីពីការប្រកាសធ្វើសង្គ្រាមឈ្លានពានប្រទេសមួយ ដូចដែលអាមេរិកធ្លាប់ធ្វើទៅលើអ៊ីរ៉ាក់នោះឡើយ ប៉ុន្តែមន្ទីរបញ្ចកោណដែលជាក្បាលម៉ាស៊ីនការពារជាតិអាមេរិកនោះ បានចេញមុខបន្ថយកម្តៅ ដោយបញ្ជាក់ថា ខ្លួនមិនបានទទួលបញ្ជាឲ្យចេញទ័ព ឬសព្វាវុធអ្វីឡើយ ដើម្បីប្រឆាំងទៅនឹងរបបដឹកនាំវេណេស៊ុយអេឡា បើទោះបីជា លោក ដូណាល់ ត្រាំ បានរំលឹកពីជម្រើសនេះ នៅក្នុងបទអត្ថាធិប្បាយរបស់លោកក៏ដោយ។ នេះបើតាមការចេញផ្សាយដោយ សារព័ត៌មានរុស្ស៊ី Sputnik នារសៀលថ្ងៃសៅរ៍ ទី១២ ខែសីហា ឆ្នាំ២០១៧។
អ្នកនាំពាក្យមន្ទីរបញ្ចកោណ លោក អេរីច ផាហុន (Eric Pahon) ត្រូវបានសារព័ត៌មាន CNN អាមេរិកធ្វើការដកស្រង់សម្តី ដែលបានថ្លែងបញ្ជាក់យ៉ាងដូច្នេះនៅថ្ងៃនេះថា «មន្ទីរបញ្ចកោណមិនបានទទួលបញ្ជាណាមួយ ដែលពាក់ព័ន្ធទៅនឹងវេណេស៊ុយអេឡានោះឡើយ។ ប៉ុន្តែប្រសិនបើជាមានបទបញ្ជាត្រូវបានដាក់មកនោះ យើងនឹងខិតខំប្រឹងប្រែងធ្វើទៅតាមការបញ្ជារបស់រដ្ឋាភិបាល ក្នុងគោលដៅការពារផលប្រយោជន៍ជាតិរបស់យើងជានិច្ច»។
គួរបញ្ជាក់ថា នៅថ្ងៃសុក្រសប្តាហ៍នេះ ប្រធានាធិបតីវេណេស៊ុយអេឡា លោក នីកូឡាស ម៉ាឌូរ៉ូ (Nicolas Maduro) បានបញ្ជាឲ្យរដ្ឋមន្ត្រីការបរទេសរបស់ខ្លួន ធ្វើការទាក់ទងទៅកាន់សមភាគីអាមេរិក ដើម្បីរៀបចំកិច្ចពិភាក្សាឯកជន ឬកិច្ចសន្ទនាតាមទូរស័ព្ទមួយ ដើម្បីធ្វើឲ្យស្ថានការណ៍ដ៏ក្តៅគគុកនេះ ធូរស្រាលបន្តិចមកវិញ ជុំវិញបញ្ហាដែលប្រទេសអាមេរិកឡាទីនមួយនេះ បានធ្វើការប្រកាស និងតែងតាំងសភាធម្មនុញ្ញថ្មីមួយ ដោយមានសុទ្ធតែជាអ្នកគាំទ្រ លោក ម៉ាឌូរ៉ូ ជាសមាជិក។ ប្រការនេះបានធ្វើឲ្យសហរដ្ឋអាមេរិកខឹងសម្បារជាខ្លាំង រហូតដល់ លោក ត្រាំ ធ្លោយមាត់អះអាងថា នឹងអាចប្រើប្រាស់យោធា ដើម្បីប្រឆាំងនឹងរបបដឹកនាំ ម៉ាឌូរ៉ូ ដែលអាមេរិកទើបតែបញ្ចូលឈ្មោះទៅក្នុង «បញ្ជីខ្មៅនៃមេដឹកនាំផ្តាច់ការពិភពលោកនោះ»។
រំលឹកកាលពីពេលនេះនេះ រដ្ឋមន្រ្តីក្រសួងការពារជាតិវេណេស៊ុយអេឡា លោក វ៉្លាឌីមៀ ផាឌ្រីណូ (Vladimir Padrino) បានចេញមុខហៅពាក្យសម្តីគំរាមកំហែងប្រើប្រាស់កម្លាំងយោធាមកប្រទេសវេណេស៊ុយ របស់ប្រធានាធិបតីសហរដ្ឋអាមេរិក លោក ដូណាល់ ត្រាំ ថាជាសកម្មភាពមិនគ្រប់ទឹក។
លោក ដូណាល់ ត្រាំ បានថ្លែងប្រាប់ក្រុមអ្នកសារព័ត៌មានថា សហរដ្ឋអាមេរិក ពុំអាចធានាបានទាំងស្រុងថា នឹងមិនជ្រើសរើសប្រើសកម្មភាពយោធាប្រឆាំងនឹងប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ (Nicolas Maduro) នោះឡើយ ដោយសារតែការកើនឡើងនៃ ចំនួនមនុស្សស្លាប់ដ៏ច្រើនសន្ធឹកសន្ធាប់នៅក្នុងអំឡុងការធ្វើបាតុកម្មដ៏កក្រើក នៅក្នុងប្រទេសអាមេរិកឡាទីនមួយនេះ។ ជុំវិញរឿងនេះលោករដ្ឋមន្រ្តីការពារជាតិវេណេស៊ុយអេឡា បានប្រាប់ស្ថានីយ៍ទូរទស្សន៍ក្នុងស្រុកថា «វាគឺជាសកម្មភាពឡប់សតិ... ជារោគសញ្ញានៃអំពើជ្រុលនិយម។ សហរដ្ឋអាមេរិក កំពុងស្ថិតក្រោមការគ្រប់គ្រងរបស់មេជ្រុលនិយម»៕
http://www.elfagr.org/upload/photo/news/255/8/600x338o/140.jpg
