(សេអ៊ូល)៖ កូរ៉េខាងជើង​នៅថ្ងៃពុធនេះ​បាន​គំរាមវាយប្រហារ​ដោយគ្រាប់មីស៊ីល លើមូលដ្ឋានទ័ព​អាមេរិក​នៅលើកោះ Guam តែប៉ុន្មាន​ម៉ោងប៉ុណ្ណោះបន្ទាប់ពី​ប្រធានាធិបតីអាមេរិក លោក ដូណាល់ ត្រាំ បានព្រមាន​ទីក្រុងព្យុងយ៉ាង កុំបង្កការ​គំរាមកំហែង​ផ្សេងទៀតឲ្យ​សោះ​ដល់សហរដ្ឋអាមេរិក បើមិនចង់ភ្លក្ស​រសជាតិភ្លើងកំហឹង ដែលពិភពលោក​ពុំធ្លាប់​បានឃើញ​ពីមុនមក។ នេះបើតាមសារព័ត៌មានរដ្ឋកូរ៉េខាងជើង KCNA ដកស្រង់ដោយសារព័ត៌មាន BBC នៅព្រឹកថ្ងៃពុធ ទី០៩ ខែសីហា ឆ្នាំ២០១៧។

យោងតាម KCNA កូរ៉េខាងជើង​កំពុងពិចារណា ប្រើប្រាស់គ្រាប់​មីស៊ីល Hwasong-12 វាយប្រហារទៅលើកោះ Guam បើសិនជា លោក គីម ជុងអ៊ុន ហើបមាត់តែ​បន្តិច។ KCNA បាន លើកឡើងយ៉ាងដូច្នេះថា «កងទ័ព​យុទ្ធសាស្ត្រ​កូរ៉េខាងជើង កំពុងពិចារណា ក៏ដូចជាត្រៀម​ខ្លួនរួចហើយ ដើម្បីវាយប្រហារ​ដោយគ្រាប់មីស៊ីល​ផ្លោង​រយៈចំងាយ​មធ្យម Hwasong-12 លើកោះ Guam រួមទាំងមូលដ្ឋានទ័ព​អាកាស Andersen... ហើយផែនការនេះ នឹងត្រូវទទួលការត្រួតពិនិត្យ និងសម្រេ​ចចិត្តឱ្យបានឆាប់រហ័ស ឱ្យតែមានបញ្ជាពីមេដឹកនាំកំពូល​របស់យើង គឺលោក គីម ជុងអ៊ុន»។

គួរបញ្ជាក់ថា កាលពីខែកក្កដា​កន្លងទៅ កូរ៉េខាងជើង​បានអះអាងពី​ជោគជ័យនៃ​ការបាញ់សាកល្បង​មីស៊ីលផ្លោង​ឆ្លងទី្វប ICBM លើកទី ០២ របស់ខ្លួន​ ដោយបញ្ជាក់​ប្រាប់ពិភពលោក​ទៀតថា មីស៊ីលនេះ​អាចបាញ់ដល់ដីគោក​សហរដ្ឋអាមេរិក និងគ្រប់ទីកន្លែង​ទំាងអស់​នៅលើ​ផែនដី៕