(អាមេរិក)៖ កាលពីជាង១០ឆ្នាំមុន យន្តហោះដឹកអ្នកដំណើរ​មួយគ្រឿង របស់ក្រុមហ៊ុនអាកាសចរណ៍​អាមេរិក JetBlue ដែលមានគោលដៅ​ធ្វើដំណើរចេញ​ពី​​ព្រលាន​យន្តហោះ Bob Hope ក្នុងទីក្រុង Burbank នៃរដ្ឋ​កាលីហ្វរញ៉ា ឆ្ពោះទៅកាន់​អាកាសយានដ្ឋាន​អន្តរជាតិ John F. Kennedy ក្នុងទីក្រុង​ញូយ៉កនោះ ត្រូវ​បាន​អាកាស​យានិក​ដ៏ស្ទាត់ជំនាញ ធ្វើការបញ្ជាចុះចត​ដោយជោគជ័យ​គួរឲ្យកោតសរសើរ នៅឯអាកាស​យានដ្ឋាន​អន្តរជាតិ Los Angeles បន្ទាប់​ពី​កង់​ផ្នែក​​ខាង​មុខ​របស់​វា បានជាប់គាំង​នៅក្នុងស្ថានភាព​ខុសប្រក្រតី។ ពុំមានមនុស្ស​រងគ្រោះនៅក្នុងហេតុការណ៍​នោះឡើយ។ នេះ​បើ​តាម​ការ​ដក​ស្រង់​ព័ត៌​មាន​ចេញ​ពី​​វែបសាយ Wikipedia នៅល្ងាចថ្ងៃអង្គារ ទី០៨ ខែសីហា ឆ្នាំ២០១៧។

ក្រោយពី​ហោះចាកចេញពី​​ទីក្រុង Burbank អាកាសយានិកក៏បានដឹងថា ពួកគេ​មិនអាច​លើកកង់​នៅផ្នែកខាងមុខរបស់​យន្តហោះបាន។ បន្ទាប់មក​ពួកគេបាន​ហោះហើរ​​ ក្នុងរយៈកម្ពស់​ទាប នៅពីលើព្រលាន​យន្តហោះ LGB ក្នុងទីក្រុង Long Beach ដើម្បីឲ្យមន្រ្តី​នៅ​ក្នុងស្ថានីយ៍គ្រប់គ្រង​ការហោះហើរ​ របស់ព្រលាន​យន្ត​ហោះ ពិនិត្យមើលកង់​​របស់យន្តហោះ Airbus A320-200 នេះ​មុននឹង​ធ្វើការ​ត្រៀមចុះចត ហើយក៏ត្រូវបាន​គេ​រកឃើញថា កង់ផ្នែកខាងមុខ​​របស់យន្តហោះ​បាន​បត់តែក្នុងរង្វាស់​មុំ ៩០ដឺក្រេ ប៉ុណ្ណោះ។

ភ្លាមៗនោះ​ជាជាងចុះចតនៅ​ឯព្រលានយន្តហោះ Long Beach អាកាសយានិក​ដែលជាកុម៉ង់ដង់ បានសម្រេច​ចិត្តថា យន្តហោះ​របស់ពួកគេ នឹងធ្វើការចុះចត​នៅ​ឯអាកាសយានដ្ឋាន​អន្តរជាតិ Los Angeles ដោយសារតែភាពអំណោយផលនៃផ្លូវដ៏ធំវែង រួមនិងបរិក្ខាសុវត្ថិភាពទំនើបៗនៅទីនោះ។ ក្រោយមកអាកាស​និក បានហោះហើរយន្តហោះនោះ ដែលអាចស្តុកប្រេងបានទម្ងន់ ២១,២៥៥គីឡូក្រាម ឆ្វែលទៅឆ្វែលមក នៅចន្លោះព្រលាន​យន្តហោះ Bob Hope និងអាកាសយានដ្ឋាន Los Angeles អស់រយៈពេលជិតបីម៉ោង ដើម្បីប្រើប្រាស់សាំង​ឲ្យជិតអស់ និងកាត់បន្ថយហានិភ័យ​នៃការកើតមានគ្រោះអគ្គីភ័យ នៅ​ពេល​​ចុះ​ចត ព្រោះថា​យន្តហោះ Airbus A320 នេះ ពុំមានប្រព័ន្ធបង្ហៀរប្រេងនោះឡើយ។

នៅទីបំផុតអាកាសយានិក​របស់យន្តហោះ ក៏បានសម្រេច​ការចុះចតយន្តហោះដឹកអ្នកដំណើរ ដែលមានផ្ទុកមនុស្សចំនួន ១៤៦នាក់នេះ ដោយជោគជ័យ ជាមួយវត្តមាន​​សេវា​សង្រ្គោះ​បន្ទាន់ និងភ្នាក់ងារពន្លត់អគ្គីភ័យ​យ៉ាងច្រើន​សន្ធឹកសន្ធាប់ នៅផ្លូវចុះចត​ក្នុង​អាកាសយានដ្ឋាន Los Angeles៕