(យូអិន)៖ អគ្គលេខាធិការនៃអង្គការសហប្រជាជាតិ លោក Antonio Guterres នាថ្ងៃចន្ទនេះ បានអំពាវនាវយ៉ាងទទូចដល់ជនរួមជាតិ​វេណេស៊ុយអេឡា​ទាំងអស់ បន្ធូរបន្ថយ​ភាពតានតឹង និងងាកទៅរកការចរចា​គ្នាដោយ​សន្តិវិធីវិញ ដើម្បីដោះស្រាយបញ្ហាខ្វែងគំនិតគ្នា​យ៉ាងស៊ីជម្រៅក្នុងសង្គម​នៃប្រទេសអាមេរិកឡាទីនមួយនេះ។ នេះបើអ្នកនាំពាក្យ​របស់ លោក Guterres ដកស្រង់ដោយ​ទីភ្នាក់ងារ​ព័ត៌មានចិន ស៊ីនហួរ នៅ​ព្រឹក​​ថ្ងៃអង្គារ ទី០៨ ខែសីហា ឆ្នាំ២០១៧។

អ្នកនាំពាក្យប្រមុខ​ដឹកនាំ UN លោក Stephane Dujarric នៅពេលត្រូវបាន​ចោទសួរអំពីស្ថានការណ៍​វិវឌ្ឍន៍ចុង​ក្រោយបំផុត នៅក្នុងប្រទេស​អាមេរិកឡាទីន​​មួយនេះ បានឆ្លើយ​តបថា «នៅក្នុងតំណាក់​កាលដ៏សំខាន់សម្រាប់អនាគត​របស់ប្រទេសនេះ លោក Guterrest សូមអំពាវនាវ​ដល់ជនរួមជាតិ​វេណេស៊ុយអេឡា​ទាំងអស់ ឲ្យធ្វើការប្រឹងប្រែង​ឲ្យអស់ពី​សមត្ថភាព ដើម្បីកាត់​បន្ថយ​ភាពតានតឹង ហើយងាក​ទៅរកការចរចា​ផ្នែកនយោបាយ​ដោយសន្តិវិធី»។

គួរបញ្ជាក់ថា ការប៉ះទង្គិចគ្នា​ដែលបានផ្ទុះឡើង រវាងកងកម្លាំងសន្តិសុខ និងក្រុមបាតុករប្រឆាំងនឹង ការបោះឆ្នោតបង្កើត​សភាធម្មនុញ្ញថ្មីនោះ បានបណ្តាល​ឲ្យ​មនុស្សច្រើនជាង ១២០នាក់ ហើយបាត់បង់ជីវិត៕