(អ៊ីស្រាអែល)៖ អ៊ីស្រាអែលគ្រោង​នឹងបិទការិយាល័យ​ សាខារបស់ស្ថានីយ៍ទូរទស្សន៍ Al Jazeera ដែលមានទីស្នាក់ការ​កណ្តាល​នៅប្រទេសកាតាចោល ហើយ​ដក​សិទ្ធិ​ទទួល​ស្គាល់​​ផ្នែក​សារ​ព័ត៌មាន របស់អ្នកកាសែត​នៃបណ្តាសារព័ត៌មាន​កាតានេះ រាប់សិបនាក់ថែម​ទៀតផង។ នេះបើតាម​ក្រសួង​ទូរគមនាគមន៍​របស់​​អ៊ីស្រាអែល លោក Ayoub Kara ដកស្រង់សម្តី​ដោយ​សារព័ត៌មានចិន CGTN នៅរសៀលថ្ងៃចន្ទ ទី០៧ ខែសីហា ឆ្នាំ២០១៧។

ថ្លែងក្នុងសន្និសីទ​សារព័ត៌មាន​មួយនៅ​ឯទីក្រុង​ហ្សេរុយសាឡឹម ដែលទីភ្នាក់ងារ Al Jazeera ត្រូវបានហាមឃាត់​មិនឲ្យ​ចូលរួមនោះ លោក Ayoub Kara បាន​ប្រកាសថា «យើងបាន​សម្រេចចិត្ត​បិទការិយាល័យ​របស់ សារព័ត៌មាន Al Jazeera និងហាមឃាត់បណ្តាផ្សព្វផ្សាយ​របស់ពួកគេ ដោយសារស្ថានីយ៍​​ទូរ​ទស្សន៍​នេះ កំពុងត្រូវក្រុម​មួយចំនួន​ប្រើប្រាស់ ដើម្បីញុះញង់​ឲ្យ​ផ្ទុះអំពើហិង្សា»។

លោក Kara រំពឹងថា សភាអ៊ីស្រាអែល​នឹងធ្វើការពិចារណា​ចំពោះសំណើ​​របស់​លោក នៅក្នុងសម័យ​ប្រជុំបន្ទាប់​នាពេលខាងមុខ ក៏ប៉ុន្តែវិធានការ​ប៉ុនប៉ង​បិទ​ការិយាល័យ​ស្ថានីយ៍​ទូរទស្សន៍ Al Jazeera នេះ ទំនងជាមិនអាច​កើតឡើង​នាពេលឆាប់ៗ​នេះឡើយ ដោយមន្រ្តី​រដ្ឋាភិបាលអ៊ីស្រាអែល​មួយរូប​បានឲ្យដឹង​ថា​ សំណើរនេះ ត្រូវតែឆ្លងកាត់​នីតិវិធីច្បា​ប់ជាច្រើនដំណាក់​កាលថែមទៀត។

គួរបញ្ជាក់ថា កាលពីខែកក្កដាកន្លងទៅ​នាយករដ្ឋមន្រ្តីអ៊ីស្រាអែល លោក Benjamin Netanyahu បានថ្លែងថា រូបលោក នឹងចាត់វិធានការ ដើម្បីបិទការិយា​ល័យរបស់បណ្តាញសារព័ត៌មាន Al Jazeera នៅក្នុង​ប្រទេស​អ៊ីស្រាអែល ដោយបានចោទប្រកាន់ថា ស្ថានីយ៍ទូរទស្សន៍នេះ​បានញុះញង់ឲ្យផ្ទុះ​អំពើហិង្សា​នៅក្នុងទីក្រុង​ហ្សេរុយសាឡឹម រួមទាំងនៅទីសក្ការៈ​បូជាដ៏ពិសិដ្ឋ​មួយកន្លែង របស់ជនមូស្លីម និងជ្វីបថែមទៀតផង៕