(វ៉ាស៊ីនតោន)៖ ទីបំផុតក្រសួងការបរទេសសហរដ្ឋអាមេរិក បានចេញសេចក្តីថ្លែងការណ៍ជាផ្លូវការមួយ ដោយប្រកាសថាឱឡារិកថា ទីក្រុងវ៉ាស៊ីនតោនមិនទទួលស្គាល់ជាដាច់ខាត ចំពោះសភាធម្មនុញ្ញថ្មី​របស់ប្រទេស​វេណេស៊ុយអេឡា (ANC) ដែលទើប​ជាប់ឆ្នោត និងមានសមាជិកសភាដែល​សុទ្ធសឹងតែជាអ្នកគាំទ្រ​ប្រធានាធិបតីបច្ចុប្បន្ន លោក នីកូឡាស់ ម៉ាឌូរ៉ូ នោះ។ នេះបើតាមការ​ចេញផ្សាយដោយ ទីភ្នាក់ងារព័ត៌មានចិន ស៊ីនហួរ នារសៀល​ថ្ងៃសុក្រ ទី០៤ ខែសីហា ឆ្នាំ២០១៧។

សេចក្តីថ្លែងការណ៍​របស់ក្រសួងការបរទេសអាមេរិក បានបញ្ជាក់យ៉ាងដូច្នេះថា «យើងកំពុងតែរៀបចំ ដើម្បីជ្រើសរើសគោលដៅទាំងអស់ ដែលយើង​ត្រូវធ្វើ ហើយក៏ជាអ្វីដែល​យើងអាចធ្វើបាន ដើម្បីបង្កើត​ឲ្យមានការ​ផ្លាស់ប្តូរមួយ នៅក្នុងស្ថានភាពបែបនេះដែរ។ លោកប្រធានាធិបតី នីកូឡាស់ ម៉ាឌូរ៉ូ អាចសម្រេចចិត្តដោយមិន​គិតពីអនាគត ឬក៏អាចអូសទាញខ្លួនឯង ត្រឡប់ក្រោយមកកាន់រដ្ឋាភិបាល ដែលស្ថិតនៅក្រោមរដ្ឋធម្មនុញ្ញចាស់»។ វាមានន័យថា អាមេរិកគ្មានថ្ងៃទទួលស្គាល់ ANC របស់វេណេស៊ុយអេឡានោះឡើយ។

គួរបញ្ជាក់ថា សហរដ្ឋអាមេរិកកាលពីថ្ងៃចន្ទ បានប្រកាស​ដាក់ទណ្ឌកម្ម​ទៅលើ លោក ម៉ាឌូរ៉ូ និងមន្ត្រីជំនិតៗ​របស់​លោកមួយ​ចំនួនទៀត តែមួយថ្ងៃប៉ុណ្ណោះបន្ទាប់ពីការបោះឆ្នោត​សភាធម្មនុញ្ញថ្មី​ត្រូវបានបញ្ចប់ ហើយ លោក ម៉ាឌូរ៉ូ បានប្រកាសជា​បណ្តោះអាសន្ន​ថា ក្រុមលោកទទួល​បានជោគជ័យ​នោះ។ បន្ថែមពីនេះ រដ្ឋមន្ត្រី​រតនាគារជាតិ​អាមេរិក លោក Steven Mnuchin ក៏បានបញ្ជាក់​ផងដែរថា «អាមេរិកបាន​បង្ហាញនយោបាយ​ច្បាស់លាស់បំផុត​ហើយជុំវិញ​រឿងនេះ នោះគឺអាមេរិកប្រឆាំងចំពោះនយោបាយនានា ដែលបង្កើតឡើងដោយ​របបដឹកនាំ ម៉ាឌូរ៉ូ»៕