(វ៉ាស៊ីនតោន)៖ កងទ័ពអាកាស​សហរដ្ឋអាមេរិក បានប្រកាសពីជោគជ័យនៃការធ្វើតេស្តមីស៊ីលផ្លោងឆ្លងទ្វីប ICBM របស់ខ្លួន នៅជិតមួយសប្តាហ៍ក្រោយ​ការ​​បាញ់​សាកល្បង​មីស៊ីល ICBM ជាលើកទីពីរ​របស់ប្រទេស​កូរ៉េខាងជើង។ នេះបើតាមការ​ដកស្រង់ការផ្សាយ​ចេញពី សារព័ត៌មានរុស្ស៊ី Sputnik នៅ​ព្រឹក​ថ្ងៃ​ព្រហស្បតិ៍ ទី០៣ ខែសីហា ឆ្នាំ២០១៧។

មេទ័ពអាមេរិក លោកឧត្តមសេនីយ៍ MIchael Hough បានថ្លែងឲ្យដឹងថា សហរដ្ឋអាមេរិក​បានធ្វើតេស្ត​មីស៊ីលផ្លោងឆ្លងទ្វីប​មានឈ្មោះថា Miniuteman III ​ចំនួនមួយគ្រាប់ នៅ​​ឯ​មូលដ្ឋាន​ទ័ពអាកាស Vandenberg ក្នុងរដ្ឋ​កាលីហ្វរញ៉ា​ហើយ ដោយសារតែ​ការរួមសហការគ្នាយ៉ាងរលូនឥតខ្ជោះ​រវាងភាគីដែល​ពាក់ព័ន្ធទាំងអស់ ការធ្វើតេស្ត​ប្រតិបត្តិការ​នៃមីស៊ីល Minuteman III មួយផ្សេង​ទៀតនេះ បានប្រព្រឹត្ត​ទៅដោយ​ជោគជ័យ។ ដោយឡែក យោងតាមប្រព័ន្ធ​​ផ្សព្វផ្សាយ​ក្នុងស្រុក​របស់អាមេរិក ការធ្វើ​តេស្តនេះ ពុំមែនជាការ​ឆ្លើយតបចំពោះ​សកម្មភាព​បង្កហេតុកាល​ពីពេលថ្មីៗនេះ របស់កូរ៉េខាងជើង​នោះឡើយ តែជា​ការ​គ្រោងទុកជា​មុនយូរណាស់​មកហើយ។

គួរបញ្ជាក់ថា ការធ្វើតេស្ត​មីស៊ីលឆ្លងទ្វីប Minuteman III របស់​សហរដ្ឋអាមេរិក ត្រូវបានធ្វើឡើង​មិនដល់មួយ​សប្តាហ៍នោះទេ បន្ទាប់ពីកូរ៉េខាងជើង​បានបាញ់​​សាកល្បង​មីស៊ីលផ្លោង ICBM មួយគ្រាប់ទៀត​ជាលើកទីពីរ​ដោយជោគជ័យ៕