(ម៉ានីល)៖ សមាជិកក្រុមភេរវករ Maute Group ចំនួន៧នាក់បន្ថែមទៀត ត្រូវបានសម្លាប់នៅក្នុងការប្រយុទ្ធគ្នា ទ្រង់ទ្រាយតូចមួយជាមួយកងកម្លាំងរដ្ឋាភិបាល បានបណ្តាលឲ្យចំនួនសរុប នៃការស្លាប់របស់ក្រុមភេរវករ នៅក្នុងជម្លោះប្រដាប់អាវុធ ដែលកំពុងកើតមាន នៅទីក្រុង Marawi ប្រទេសហ្វីលីពីន កើនឡើងដល់៥០២នាក់។ នេះបើយោងតាមប្រភពពីយោធាហ្វីលីពីន ចេញផ្សាយដោយសារព័ត៌មានស៊ិនហួ។

អ្នកនាំពាក្យយោធា លោកស្រី Jo-ann Petinglay បានឲ្យដឹងថា កិច្ចការនេះបានបង្ហាញឲ្យឃើញថា កងកម្លាំងចូលកាន់តែកៀក ដើម្បីរំដោះទីក្រុងហើយ។

យោធាក្នុងតំបន់ បានប៉ាន់ស្មានថា កងកម្លាំងសត្រូវដែលនៅសល់ឈរជើង ក្នុងទីក្រុង Marawi មានប្រមាណ៥០ ទៅ៧០នាក់ប៉ុណ្ណោះ។ សមាជិកក្រុម Maute Group បានបន្ត​ប្រឆាំងនឹងកងទ័ពរដ្ឋាភិបាល ដែលកំពុងវាយលុកទៅមុខ ប៉ុន្តែនាពេលនេះ វាមិនមានភាពរឹងមាំ ដូចដែល​ក្នុងដំណាក់កាលដំបូងនៃជម្លោះ ដែលបានកើតឡើងនៅថ្ងៃទី២៣ ខែឧសភានោះទេ។ លោកស្រីអ្នកនាំពាក្យ បានបញ្ជាក់ដែរថា ចំនួនកងទាហានរដ្ឋាភិបាល ដែលត្រូវបានក្រុមភេរវករសម្លាប់ មានចំនួន១១៤នាក់ ខណៈជនស៊ីវិល មានចំនួន៤៥នាក់ នៅក្នុងជម្លោះនាទីក្រុង Marawi នេះ៕