(វ៉ាស៊ីនតោន)៖ សេតវិមាន​បានបញ្ជាក់ឲ្យ​ដឹងថា លោក Anthony Scaramucci នឹងលាលែងពី​តំណែងរបស់​លោក​ជានាយកទំនាក់ទំនង​ប្រចាំសេតវិមាន​នា​ថ្ងៃចន្ទសប្តាហ៍នេះ បន្ទាប់ពីមានសេចក្តីរាយការណ៍​ព័ត៌មានជាច្រើន ស្តីពីការលាឈប់ពីតួនាទីរបស់លោក។ នេះបើតាមការ​ចេញផ្សាយដោយ ទីភ្នាក់​ងារ​ព័ត៌មានចិន ស៊ីនហួរ នៅព្រឹក​ថ្ងៃអង្គារ ទី០១ ខែសីហា ឆ្នាំ២០១៧។

លោក Scaramucci ត្រូវបានជ្រើសតាំង​ជានាយកផ្នែកទំនាក់ទំនង​ប្រចាំសេតវិមាន ដោយប្រធានាធិបតី​អាមេរិក លោក ដូណាល់ ត្រាំ កាល​ពី​​ថ្ងៃទី២១ ខែកក្កដាថ្មីៗនេះ ក៏ប៉ុន្តែអំឡុងពេល​នៃការកាន់តួនាទី​ចំនួន ១១ថ្ងៃ របស់លោក​អតីតអ្នកនាំ​ពាក្យ​សេតវិមាន លោក Sean Spicer បានសម្រេច​លាឈប់​ពី​​តំណែង ដើម្បីសម្តែង​ការតវ៉ាប្រឆាំង​នឹងការមកដល់​របស់​លោក Scaramucci ហើយ​ក្រៅពីនេះ លោក Anthony Scaramucci ថែមទាំងបានទាស់​ពាក្យ​សម្តី​ជាមួយ លោក Reince Priebus អតីតប្រធានខុទ្ទកាល័យសេតវិមាន​ថែមទៀត​ដោយ លោក Scaramucci បានចោទ​​លោក Priebus ថាជាប្រភព​នៃការ​លេច​ធ្លាយ​​ព័ត៌មាន​នៅឯ​សេតវិមាន។

ក្រោយមក លោក Priebus ក៏បានលាលែងពី​តំណែង​ ហើយលោក ដូណាល់ ត្រាំ បានប្រកាសពី​ការជ្រើសរើស​រដ្ឋមន្រ្តីសន្តិសុខ​ជាតិ​អាមេរិក លោក John Kelly ជាប្រធាន​សេតវិមានថ្មី​ជំនួសលោក Priebus។ គួរបញ្ជាក់ថា នៅក្នុងកាន់អំណាចជាងកន្លះឆ្នាំមកនេះ រដ្ឋបាលលោក ដូណាល់ ត្រាំ ហាក់មានភាពរង្គោះរង្គើខ្លាំងរឿងការដក​ដាក់មន្ត្រីមានតួនាទីកំពូលៗ ហើយភាគច្រើននៃមន្ត្រីដែលត្រូវបានដោះដូរ តំណែងទាំងនោះ គឺជាប់ពាក់ព័ន្ធនឹងរឿងអាស្រូវ​រវាងក្រុមយុទ្ធនាការបោះឆ្នោត លោក ដូណាល់ ត្រាំ ជាមួយមន្ត្រី​រដ្ឋាភិបាលរុស្ស៊ីតែម្តង៕