(វ៉ាស៊ីនតោន)៖ សហរដ្ឋអាមេរិកបានឲ្យដឹងថា ខ្លួននឹងមិនស្នើឲ្យមានការកោះប្រជុំក្រុមប្រឹក្សាសន្តិសុខ នៃអង្គការសហប្រជាជាតិ ជុំវិញការធ្វើតេស្តមីស៊ីលផ្លោងរបស់កូរ៉េខាងជើង កាលពីយប់ថ្ងៃសុក្រសប្តាហ៍មុន ដោយសារតែវានឹងពុំអាចសម្រេចចេញជាលទ្ធផលផ្លែផ្កាអ្វីផ្សេង ដែលគួរឲ្យកត់សម្គាល់ឡើយ។ នេះបើតាមការដកស្រង់ចេញពី សារព័ត៌មានអង់គ្លេស BBC News នៅព្រឹកថ្ងៃចន្ទ ទី៣១ ខែកក្កដា ឆ្នាំ២០១៧។
ឯកអគ្គរដ្ឋទូតអាមេរិកប្រចាំអង្គការសហប្រជាជាតិ លោកស្រី Nikki Haley បានលើកឡើងក្នុងសេចក្តីថ្លែងការណ៍មួយថា ប្រទេសកូរ៉េខាងជើងបានស្ថិតក្រោមដំណោះស្រាយ និងទណ្ឌកម្មរាប់មិនអស់របស់ក្រុមប្រឹក្សាសន្តិសុខ UN រួចទៅហើយ ដែលរដ្ឋកុម្មុយនិស្តមួយនេះ បានមើលស្រាលហើយបំពានដោយគ្មានញញឹតកោតក្រែងអ្វីបន្តិចសោះ។
លោកស្រី Haley បានថ្លែងថា «ដំណោះស្រាយ UNSC ថ្មីមួយទៀត ដែលមិនបង្កើនការដាក់សម្ពាធអន្តរជាតិខ្លាំង ទៅលើប្រទេសកូរ៉េខាងជើង គឺពុំមានតម្លៃនោះឡើយ ហើយតាមធាតុជាក់ស្តែងវាគឺកាន់តែអាក្រក់ ជាការដែលមិនធ្វើអ្វីសោះទៅទៀត ពីព្រោះវានឹងផ្ញើសារទៅកាន់ លោក គីម ជុងអ៊ុន ថាសហគមន៍អន្តរជាតិ ពុំមានឆន្ទៈប្រាកដប្រជា ដើម្បីតទល់ជាមួយមេដឹកនាំផ្តាច់ការកូរ៉េខាងជើងរូបនេះឡើយ»។ នាឱកាសនោះ លោកស្រីអគ្គរដ្ឋទូតអាមេរិក ក៏បានទទូចជាថ្មីម្តងទៀត ទៅកាន់ចិនឲ្យគ្រប់គ្រងសកម្មភាពរបស់កូរ៉េខាងជើងផងដែរ ដោយលោកស្រីបាននិយាយថា «ចិនត្រូវតែសម្រេចថា តើជាចុងក្រោយខ្លួនគួរចាត់វិធានការធ្ងន់ដ៏សំខាន់ ដើម្បីដោះស្រាយបញ្ហានេះដែរ ឬយ៉ាងណា ខណៈពេលវេលាសម្រាប់ការចរចា បានឈានដល់ទីបញ្ចប់ហើយនោះ»។
គួរបញ្ជាក់ថា កាលពីកណ្តាលយប់ថ្ងៃសុក្រសប្តាហ៍មុន កូរ៉េខាងជើងបានធ្វើតេស្តបាញ់សាកល្បង មីស៊ីលផ្លោងឆ្លងទ្វីប ICBM ចំនួនមួយគ្រាប់ជាលើកទីពីរដោយជោគជ័យ ពោលគឺបីសប្តាហ៍ក្រោយពីការធ្វើតេស្ត ICBM លើកទីមួយរបស់របបដឹកនាំទីក្រុងព្យុងយ៉ាង៕
