(ប៉េកាំង)៖ ក្រសួងការបរទេសចិន បានចេញសេចក្តីថ្លែងការណ៍ថ្កោលទោសប្រទេសកូរ៉េខាងជើង ដែលធ្វើតេស្ត​បាញ់គ្រាប់មីស៊ីល Hwasong-14 ដូចកាលពីលើកមុន ដែលវាត្រូវបានចាត់ទុកជាការរំលោភបំពានខ្លាំងបន្ថែម​​ទៀត ទៅនឹងទណ្ឌកម្មរបស់អន្តរជាតិ ហើយសហរដ្ឋអាមេរិក និងកូរ៉េខាងត្បូងក៏បានចេញមុខថ្កោលទោសធ្ងន់ៗ​លើកូរ៉េខាងជើង​ដូចគ្នានេះដែរ។ នេះបើតាមការចេញផ្សាយដោយ បណ្តាញព័ត៌មានទាន់ហេតុការណ៍ នាព្រឹកថ្ងៃសៅរ៍ ទី២៩ ខែកក្កដា ឆ្នាំ២០១៧។

ជុំវិញបញ្ហានេះដែរ រដ្ឋមន្ត្រីក្រសួងការពារជាតិកូរ៉េខាងត្បូង​ លោក Song Young-moo បានអះអាងថា ការធ្វើ​តេស្តមីស៊ីលរបស់កូរ៉េខាងជើង ពិតជាការបង្កនូវក្តីព្រួយបារម្ភ​យ៉ាងខ្លាំង សម្រាប់ស្ថិរភាព​របស់ឧបទ្វីបកូរ៉េ និងសន្តិភាព​ពិភពលោក។ ជុំវិញបញ្ហានេះ មន្ត្រីជាន់ខ្ពស់កូរ៉េខាងត្បូង​បានព្រមានថា សហរដ្ឋអាមេរិក​នឹងធ្វើការ​ឆ្លើយតបក្នុង​ពេលឆាប់ៗនេះ តាមរយៈការបញ្ជូន​នាវាដឹកយន្តហោះ​ចម្បាំង និងយន្តហោះ​ទម្លាក់​គ្រាប់បែក​មកកាន់​ឧបទ្វីបកូរ៉េ ដើម្បីទប់ទល់​ការបង្កហេតុ​នានារបស់​កូរ៉េខាងជើង។

គួរបញ្ជាក់ថា បានបាញ់សាកល្បងមីស៊ីល Hwasong-14 កាលពីយប់ថ្ងៃសុក្រម្សិលមិញ​នេះ ក្រោមការបង្គាប់បញ្ជាពីសំណាក់ ប្រមុខដឹកនាំកំពូលផុតលេខរបស់ខ្លួន គឺលោក គីម ជុនអ៊ុន។ មីស៊ីលនេះ រត់បានចម្ងាយ៩៩៨គីឡូម៉ែត្រ ក្នុងរយៈ​ពេលប្រមាណ៤៧នាទី ហើយធ្លាក់ចូលទៅក្នុងសមុទ្រខាងកើត ឬហៅថាសមុទ្រជប៉ុន ក្រោយពីវាបានឡើងដល់កម្ពស់ជាអតិបរមា៣,៧២៤.៩​គីឡូ​ម៉ែត្រ​។

KCNA បានបន្តថា «ការតេស្តថ្មីចុងក្រោយបំផុតនេះ បានស្តែងឲ្យឃើញយ៉ាងជាក់ច្បាស់ ពីភាពគួរឲ្យទុកចិត្តបាននៃមីស៊ីលផ្លោងឆ្លងទ្វីបរបស់យើង រួម​ទាំងសមត្ថភាពនៃការបាញ់បង្ហោះវា ក្នុងស្ថានភាពដែលនឹងបង្កភាពភ្ញាក់ផ្អើលគ្មានការដឹងទុកជាមុន នៅគ្រប់ទីកន្លែងនិងគ្រប់ពេលវេលាទាំងអស់។ ជាង​នេះទៅទៀត មេដឹកនាំរបស់យើង បានលើកឡើងថា សហរដ្ឋអាមេរិក គឺស្ថិតនៅក្នុងរយៈចម្ងាយនៃការវាយប្រហាររបស់ពួកយើង»