​(ប៉ាគីស្ថាន)៖ តុលាការ​កំពូលប៉ាគីស្ថាន​នៅថ្ងៃសុក្រនេះ បានសម្រេចចិត្ត​ដកតំណែង​​នាយករដ្ឋមន្ត្រី លោក Nawaz Sharif បន្ទាប់ពីមានការស៊ើបការអង្កតលើ​អំពើពុករលួយ ពាក់ព័ន្ធនឹង​ទ្រព្យសម្បតិ្តគ្រួសាររបស់លោក។ នេះបើតាមការចេញផ្សាយ​ដោយ ទីភ្នាក់ងារសារព័ត៌មាន Reuters​ នៅរសៀលថ្ងៃសុក្រ ទី២៨ ខែកក្កដា ឆ្នាំ២០១៧។

ការសម្រេច​ចិត្តបែបនេះ​របស់តុលាការកំពូល​ប៉ាគីស្ថាន ធ្វើឡើងក្រោយ​លេចធ្លាយនូវរឿង​អាស្រូវពុករលុយ Panama Papers កាលពី​ឆ្នាំ២០១៥ ដែលថា កូនប្រុសរបស់​នាយករដ្ឋមន្ត្រី​រូបនេះ មានក្រុមហ៊ុន​លួចលាក់ជាច្រើន​នៅឯបរទេស។ ចៅក្រម Ejaz Afzal Khan នៅក្នុងតុលាការ បានគូសបញ្ជាក់យ៉ាងដូច្នេះថា «គាត់ (លោក Nawaz Sharif ) លែងមានសិទ្ធិ​ស្របច្បាប់ ធ្វើសមាជិកសភា​ទៀតបានឡើយ ហើយគាត់ត្រូវ​បញ្ចប់តួនាទីជានាយករដ្ឋមន្ត្រី»។

យ៉ាងណាក៏ដោយ លោក Nawaz Sharif មានអាយុ ៦៧ឆ្នាំ ដែលបានឡើងកាន់​តំណែងចាប់តាំងពីឆ្នាំ២០១៣​មក បានបដិសេធថា លោកមិនបាន​ប្រព្រឹត្តកំហុស​អ្វីទាំងអស់ ហើយបានហៅ​ការស៊ើបអង្កេតនេះថា លំអៀង និងមិនត្រឹមត្រូវ ខណៈតុលាការ​កំពូល ក៏បានបង្គាប់ឱ្យបើកការ​ស៊ើបអង្កេត​ លើបទឧក្រិដ្ឋប្រឆាំង​នឹងនាយករដ្ឋមន្ត្រី​រូបនេះ​ផងដែរ៕