(គូឡាឡាំពួរ)៖ តុលាការជាន់ខ្ពស់ម៉ាឡេស៊ី នៅថ្ងៃសុក្រនេះបានឱ្យដឹងថា សវនាការកាត់ក្ដីស្រ្តីពីរនាក់ ដែលត្រូវបានគេចោទប្រកាន់ថា ជាឃាតករសម្លាប់បងប្រុសម្ដាយទីទៃរបស់មេដឹកនាំកូរ៉េខាងជើង លោក គីម ជុងអ៊ុន គឺលោក គីម ជុងណាំ នឹងត្រូវប្រព្រឹត្តទៅនៅថ្ងៃទី០២ ខែតុលាខាងមុខនេះ។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃសុក្រ ទី២៨ ខែកក្កដា ឆ្នាំ២០១៧។
នាង Siti Aisyah មានអាយុ ២៥ឆ្នាំ ជាជនជាតិឥណ្ឌូណេស៊ី និងនាង Doan Thi Huong អាយុ ២៨ឆ្នាំ មកពីប្រទេសវៀតណាមត្រូវជាប់ចោទ ពីបទសម្លាប់លោក គីម ជុងណាំ ដោយប្រើប្រាស់ សារធាតុគីមីពុល VX នៅឯអាកាសយានដ្ឋានអន្តរជាតិទីក្រុងគូឡាឡាំពួរ កាលពីថ្ងៃទី១៣ ខែកុម្ភៈ។ អំពើឃាតកម្មនេះ ក៏បានបង្កជាជម្លោះការទូតបណ្ដេញមន្រី្តទូតចេញពីប្រទេសរៀងៗខ្លួន រវាងកូរ៉េខាងជើង និងម៉ាឡេស៊ីផងដែរ។ ស្រ្តីទាំងពីរនេះបានបង្ហាញខ្លួនជាមួយអាវការពារគ្រាប់ នៅចំពោះតុលាការជាន់ខ្ពស់ម៉ាឡេស៊ី ក្នុងទីក្រុងគូឡាំឡាពួរ នៅក្នុងថ្ងៃសុក្រនេះក្រោមការយាមកាមយ៉ាងតឹងរឹង ពីក្រុមប៉ូលិសជាង ២០០នាក់ ដែលត្រូវបានគេដាក់ពង្រាយនៅខាងក្រៅបរិវេណតុលាការ។ នៅក្នុងពេលបង្ហាញខ្លួននោះដែរ តុលាការបានសម្រេចយកថ្ងៃទី០២ ខែតុលា ជាថ្ងៃដំណើរការសវនាការលើរឿងក្ដីរបស់ជនជាប់ចោទទាំងពីរនាក់។
គួរបញ្ជាក់ថា សហរដ្ឋអាមេរិក និងកូរ៉េខាងត្បូងបានចោទប្រកាន់ត្រង់ៗថា របបដឹកនាំលោក គីម ជុងអ៊ុន គឺជាអ្នកនៅពីក្រោយការសម្លាប់ លោក គីម ជុងណាំ បើទោះជាទីក្រុងព្យុងយ៉ាងបដិសេធជាច្រើនដងក៏ដោយ។ ចំណែកឯនាង Siti Aisyah និងនាង Doan Thi Huong ដែលអាចនឹងប្រឈមមុខនឹងការកាត់ទោសប្រហារជីវិត ក្នុងករណីបានប្រពឹ្រត្តកំហុសដូចការចោទមែននោះបាននិយាយថា ពួកនាងត្រូវបានគេបោកឆោតថា ការសម្លាប់ លោក គីម ជុងណាំ គ្រាន់តែកម្មវិធីទូរទស្សន៍មួយ (Prank) តែប៉ុណ្ណោះ៕
