(វ៉ាស៊ីនតោន)៖ សេតវិមាននៃលោកប្រធានាធិបតីដូណាល់ ត្រាំ បាននិយាយថាពួកគេនឹងធ្វើការសម្រេចចិត្តក្នុងពេលឆាប់ៗនេះ ពាក់ព័ន្ធនឹងជោគវាសនារបស់រដ្ឋមន្ត្រីយុត្តិធម៌អាមេរិក លោក Jeff Sessions បន្ទាប់ពីលោកត្រូវបានលោកត្រាំ រិះគន់យ៉ាងចាស់ដៃ ស្របពេលមនុស្សមួយចំនួនយល់ថាអតីតព្រឹទ្ធសមាជិកសភាមកពីរដ្ឋ Alabama រូបនេះមានតែជម្រើសលាលែងពីមុខ ដំណែងដោយខ្លួនប៉ុណ្ណោះ។ នេះបើតាមការចេញផ្សាយដោយសារព័ត៌មាន BBC នៅថ្ងៃពុធ ទី២៧ ខែកក្កដា ឆ្នាំ២០១៧។

ភាពចម្រូងចម្រាស់រវាងលោកដូណាល់ ត្រាំ និងលោក ជែហ្វ សែសសិន (Jeff Sessions​) កើតមានឡើងបន្ទាប់ពីលោក សែសសិន ខ្លួនឯងបានសម្រេចចិត្តដកខ្លួនពីការស៊ើបអង្កេតរបស់ FBI ជុំវិញការលូកដៃពីរុស្ស៊ីចូលក្នុងកិច្ចការបោះឆ្នោតប្រធានាធិបតីអាមេរិកកាលពីឆ្នាំ២០១៦។ មិនតែប៉ុណ្ណោះ នាពេលថ្មីៗនេះ កាសែត Washington Post ក៏បានរាយការណ៍ដែរថា លោកធ្លាប់បានជួបសន្ទនាជាសម្ងាត់ជាមួយអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន លោក Sergey Kisliak។ ដោយឡែក លោកត្រាំ ជាថ្មីម្ដងទៀត នៅក្នុងប្រអប់បញ្ចេញមតិលើ Twitter បានលើកឡើងដូច្នេះថា៖ «រដ្ឋមន្រ្តីយុត្តិធម៌ (អគ្គរដ្ឋអាជ្ញា) លោក ជែហ្វ សែសសិន បានប្រកាន់គោលជំហរទន់ខ្សោយជាទីបំផុតស្ដីពីបទឧក្រិដ្ឋរបស់ (លោកស្រី) ហ៊ីលឡារី គ្លីនតុន (ទាក់ទិន នឹងអ៊ីមែល និង Server របស់គណៈកម្មាធិការគណបក្សប្រជាធិបតេយ្យ (DNC) ដែលបានបែកធ្លាយ»។

គួររំលឹកថា កាលពីថ្ងៃទី១៩ ខែកក្កដា លោក ដូណាល់ ត្រាំ បានប្រាប់កាសែត New York Times​ ថាលោកពិតជាស្ដាយក្រោយណាស់ ដែលតែងតំាង លោក សែសសិន ជារដ្ឋមន្ត្រីយុត្តិធម៌ ហើយថាបើលោកដឹងមុនថាលោកសែសសិន ដកខ្លួនពីការស៊ើបអង្កេត នោះលោកក៏នឹងមិនតែងតាំងអតីតព្រឹទ្ធសមាជិកសភាមកពីរដ្ឋ Alabama រូបនេះដែរ៕