(សេអ៊ូល)៖ ក្រសួងបង្រួបបង្រួមជាតិរបស់កូរ៉េខាងត្បូង បានអំពាវនាវឲ្យប្រទេសកូរ៉េខាងជើង ធ្វើការសម្រេចចិត្តប្រកបដោយភាពប្រុងប្រយ័ត្ន ឆ្លើយតបទៅនឹងការចេញផ្សាយព័ត៌មានកាលពីពេលថ្មីៗនេះថា ទីក្រុងព្យុងយ៉ាងកំពុងតែរៀបចំគំរោងធ្វើតេស្តគ្រាប់មីស៊ីលបន្ថែមទៀត ដែលនឹងអាចកើតមានឡើងក្នុងសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មានកូរ៉េខាងត្បូង យ៉ុនហាប់ នាព្រឹកថ្ងៃអង្គារ ទី២៥ ខែកក្កដា ឆ្នាំ២០១៧។
ការអំពាវនាវនៅថ្ងៃអង្គារនេះ បានកើតមានឡើងបន្ទាប់ពីបណ្តាញព័ត៌មានដ៏ល្បីរបស់អាមេរិក CNN បានចេញផ្សាយថា ប្រទេសកូរ៉េខាងជើង ហាក់ដូចជាកំពុងតែរៀបចំខ្លួន សម្រាប់ការធ្វើតេស្តគ្រាប់មីស៊ីលដ៏មានអានុភាពរបស់ខ្លួនបន្ថែមទៀតនៅថ្ងៃទី២៧ ខែកក្កដា ក្នុងសប្តាហ៍នេះ ដើម្បីប្រារព្ធខួបទី ៦៤ឆ្នាំ នៃការបញ្ចប់សង្គ្រាមកូរ៉េទាំងពីរឆ្នាំ១៩៥០-១៩៥៣។ ដូច្នេះក្រសួងបង្រួបបង្រួមជាតិកូរ៉េខាងត្បូង បានអំពាវនាវឲ្យកូរ៉េខាងជើងគិតគូរឡើងវិញឲ្យបានហ្មត់ចត់បំផុតមុននឹងធ្វើតេស្តនោះ ហើយកូរ៉េខាងត្បូងក៏ត្រៀមខ្លួនធ្វើការទប់ទល់ចំពោះការបង្កហេតុនោះឲ្យបានយ៉ាងតឹងរឹងបំផុតផងដែរ។
គួរបញ្ជាក់ថា ប្រទេសកូរ៉េខាងជើងហាក់មិនទាន់មានការឆ្លើយតប ដែលអាចទទួលយកបានណាមួយចំពោះការស្នើពីសំណាក់ លោក មូន ជែអ៊ីន ប្រធានាធិបតីកូរ៉េខាងត្បូង ដើម្បីឲ្យមានការរៀបចំកិច្ចពិភាក្សាយោធាអន្តរកូរ៉េដើម្បីបន្ធូរបន្ថយភាពតានតឹងនោះឡើយ បើទោះបីជាទីក្រុងសេអ៊ូលហាក់បង្ហាញចេតនារឹតតែទន់ភ្លន់ ដោយសារតែចង់ឲ្យមានការថមថយនូវកម្តៅ តាមព្រំដែនរវាងគ្នាក៏ដោយ។
គួររំលឹកឡើងវិញថា នៅសប្តាហ៍នេះទីក្រុងវ៉ាស៊ីនតោន នឹងធ្វើការសាកល្បងបាញ់គ្រាប់ពិត នៃប្រព័ន្ធខែលការពារមីស៊ីលកម្រិតខ្ពស់ THAAD ចេញពីទីតាំងបង្ហោះគ្រាប់រ៉ុក្កែតនៅលើកោះ Kodiak នៃរដ្ឋ Alaska បន្ទាប់ពីទីភ្នាក់ងារការពារមីស៊ីលអាមេរិក (MDA) ទើបតែបានសម្រេចជោគជ័យ នៃការធ្វើតេស្តប្រព័ន្ធ THAAD កាលពីដើមខែកក្កដានេះ ដែលកាលនោះវាត្រូវបានធ្វើឡើង ដើម្បីតេស្តសមត្ថភាពរបស់ THAAD ក្នុងការបាញ់ស្ទាក់មីស៊ីលផ្លោង IRBM។
ការធ្វើតេស្តសាកល្បងសាជាថ្មីម្តងទៀតនេះ មានគោលដៅដើម្បីតេស្តសមត្ថភាពរបស់ប្រព័ន្ធ THAAD ក្នុងការបាញ់កម្ទេចមីស៊ីលផ្លោង MRBM ដែលមានរយៈចម្ងាយខ្លីជាង IRBM ហើយស្រដៀងទៅនឹងគ្រាប់មីស៊ីល Hwasong-14 ដែលកូរ៉េខាងជើងធ្វើតេស្តកាលពីខែមុន ហើយក៏ស្របពេលដែលមានលេចលឺព័ត៌មានថា កូរ៉េខាងជើងកំពុងរៀបចំធ្វើតេស្តគ្រាប់មីស៊ីល បន្ថែមទៀតនោះផងដែរ៕
