តែមួយថ្ងៃ ពួកឧទ្ទាមតាលីបង់ បើកការវាយប្រហារបំផ្ទុះគ្រាប់បែកយ៉ាងកក្រើក នៅអាហ្វហ្គានីស្ថាននិងប៉ាគីស្ថាន ដែលបានផ្តាច់ជីវិតមនុស្សជាង៦០នាក់ និងធ្វើឲ្យរបួសរាប់សិបនាក់ផ្សេងទៀត
24-07-2017 23:00
(អ៊ីស្លាម៉ាបាដ)៖ ជនបំផ្ទុះគ្រាប់បែកអត្តឃាតម្នាក់ បានផ្តាច់យកជីវិតមនុស្សយ៉ាងហោចណាស់ចំនួន២៦នាក់ ដែលជាច្រើននាក់ក្នុងចំណោមនោះគឺជាមន្រ្តីប៉ូលិស ហើយបានបណ្តាលឲ្យប្រមាណជិត៦០នាក់ផ្សេងទៀតទទួលរបួស នៅឯទីក្រុង Lahore ភាគខាងកើតប្រទេសប៉ាគីស្ថាន។ នេះបើតាមការចេញផ្សាយដោយ សារព័ត៌មានក្នុងស្រុករបស់ប៉ាគីស្ថានផ្ទាល់ នៅយប់ថ្ងៃចន្ទ ទី២៤ ខែកក្កដា ឆ្នាំ២០១៧។
មេបញ្ជាការប៉ូលិសទីក្រុង Lahore លោក Haider Ashraf បានថ្លែងប្រាប់ក្រុមអ្នកសារព័ត៌មានដូច្នេះថា «យើងមានការសង្ស័យថា ជនបំផ្ទុះគ្រាប់បែកអត្តឃាតរូបនោះ បានបើកម៉ូតូបំបុកចូលទៅកាន់ប៉ុស្តិ៍ត្រួតពិនិត្យរបស់ប៉ូលិសមួយកន្លែង»។ បើតាមសេវាសង្រ្គោះបន្ទាន់របស់ប៉ាគីស្ថាន តួលេខនៃចំនួនមនុស្សស្លាប់នាខណៈពេលនេះគឺ២៦នាក់ រីឯអ្នកដែលបានទទួលរងរបួសគឺ៥៦នាក់ ហើយវាអាចនឹងបន្តកើនឡើងថែមទៀត។
ក្រោយហេតុការណ៍បំផ្ទុះគ្រាប់បែកអត្តឃាតខាងលើ ក្រុមតាលីបង់ប្រចាំនៅប៉ាគីស្ថាន បានចេញមុខអះអាងថា គឺជាអ្នករៀបចំគម្រោងវាយប្រហារនេះ។ ពួកនេះគឺជាបក្ខពួករបស់ក្រុមឧទ្ទាមតាលីបង់ នៅឯប្រទេសអាហ្វហ្គានីស្ថាន ក៏ប៉ុន្តែផ្តោតគោលដៅវាយប្រហាររបស់ពួកគេ ទៅលើរដ្ឋាភិបាលរបស់ប៉ាគីស្ថាន។
សូមជម្រាបថា នាថ្ងៃដដែលនេះ ហេតុការណ៍បំផ្ទុះរថយន្តដ៏កក្រើកមួយផ្សេងទៀត ក៏បានកើតមានឡើងផងដែរ នៅឯរដ្ឋធានីកាប៊ុល នៃប្រទេសអាហ្វហ្គានីស្ថាន ដែលបានបណ្តាលឲ្យមនុស្សយ៉ាងតិច៣៥នាក់ស្លាប់ និងជាង៤០នាក់ទៀតរងរបួស ហើយវាគឺជាស្នាដៃរបស់ពួកតាលីបង់ដូចគ្នា៕
