(វ៉ាស៊ីនតោន)៖ ក្រសួងការពារជាតិអាមេរិកបានលើកឡើងថា ការចេញផ្សាយដោយទីភ្នាក់ងារព័ត៌មានរដ្ឋតួកគី ស្តីពីទីតាំងនៃមូលដ្ឋានយោធារបស់សហរដ្ឋអាមេរិក នៅក្នុងប្រទេសស៊ីរីនោះអាចធ្វើឲ្យកងទ័ពអាមេរិកស្ថិតក្រោមភាពគ្រោះថ្នាក់ធ្ងន់ធ្ងរបាន ខណៈទីក្រុងវ៉ាស៊ីនតោនក៏បានត្អូញត្អែរអំពីបញ្ហានេះទៅកាន់ប្រទេសតួកគី ដែលជាសមាជិកដ៏សំខាន់របស់អង្គការ NATO ផងដែរ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅព្រឹកថ្ងៃព្រហស្បតិ៍ ទី២០ ខែកក្កដា ឆ្នាំ២០១៧។
កាលពីថ្ងៃអង្គារសប្តាហ៍នេះ ទីភ្នាក់ងារព័ត៌មាន Anadolu បានចេញផ្សាយសេចក្តីរាយការណ៍មួយ ដែលបញ្ជាក់ពីទីតាំងនៃមូលដ្ឋានយោធាចំនួន ១០របស់សហរដ្ឋអាមេរិក នៅភាគខាងជើងប្រទេសស៊ីរី ហើយថែមទាំងបានឲ្យដឹងលម្អិតអំពី ចំនួនពលទាហានអាមេរិក និងបារាំងដែលមានវត្តមាននៅទីនោះទៀតផង។
ជុំវិញរឿងនេះអ្នកនាំពាក្យមន្ទីរបញ្ចកោន (ក្រសួងការពារជាតិអាមេរិក) លោក Eric Pahon បានថ្លែងថា «ការបញ្ចេញព័ត៌មានយោធាដ៏សំខាន់បែបនេះ បានបង្កឲ្យកងកម្លាំងចម្រុះអន្តរជាតិ ស្ថិតក្រោមហានិភ័យក៏ដូចជាគ្រោះថ្នាក់ ដែលមិនចាំបាច់ ហើយទង្វើនេះមានសក្តានុពលអាចបីបង្កការរាំងស្ទះដល់ប្រតិបត្តិការកម្ចាត់ក្រុម ISIS ដែលកំពុងតែប្រព្រឹត្តទៅយ៉ាងក្តៅគគុក»។ លោក Pahon បានបន្តថា «ស្របពេលដែលយើងមិនអាចបញ្ជាក់ពីប្រភព ដែលបានចូលរួមចំណែកក្នុងរឿងនេះបាន ពួកយើងនឹងមានក្តីព្រួយបារម្ភជាខ្លាំង ប្រសិនបើមន្រ្តីមកពីប្រទេសសម្ព័ន្ធមិត្តរបស់ NATO បានប៉ុនប៉ងបង្កគ្រោះថ្នាក់ដោយចេតនាដល់កងទ័ពរបស់យើង តាមរយៈការបញ្ចេញព័ត៌មានទាំងនេះ»។
គួរបញ្ជាក់ថា បើតាមលោក Pahon សហរដ្ឋអាមេរិកបានបង្ហាញពីក្តីព្រួយបារម្ភរបស់ខ្លួន ទៅកាន់តួកគីរួចរាល់ហើយ។ យ៉ាងណាមិញទំនាក់ទំនងរវាងទីក្រុងអង់ការ៉ា និងទីក្រុងវ៉ាស៊ីនតោន បានទទួលរងភាពរង្គោះរង្គើរស្រាប់ទៅហើយ ដោយសារការសម្រេចចិត្តរបស់សហរដ្ឋអាមេរិក ក្នុងការគាំទ្រ និងផ្តល់សព្វាវុធដល់ក្រុមអ្នកប្រយុទ្ធឃើដ YPG ដើម្បីកម្ចាត់ក្រុមរដ្ឋអ៊ីស្លាម ISIS ចេញពីក្រុង Raqqa ដែលជាមូលដ្ឋានស្នូលរបស់ពួកគេ នៅក្នុងប្រទេសស៊ីរី។ តួកគីចាត់ទុកថា YPG ជាចង្កោមរបស់គណបក្សពលករឃើដ ជាពួកឧទ្ទាមឃើដចង់ផ្តាច់រដ្ឋ ដែលបាននិងកំពុងបង្កការបះបោរនៅភាគអាគ្នេយ៍តួកគី ចាប់តាំងពីទសវត្សរ៍ឆ្នាំ១៩៨០មកម្ល៉េះ៕
