(ហាណូយ)៖ ព្យុះ Talas ដែលបានវាយប្រហារតំបន់ភាគកណ្តាលប្រទេសវៀតណាម កាលពីដើមសប្តាហ៍នេះ និងក្លាយជាព្យុះត្រូពិកទីពីរ ដែលប្រជាជាតិអាស៊ានមួយនេះ បានជួបប្រទះនៅក្នុងឆ្នាំ២០១៧នេះនោះ បានបន្សល់ទុកមនុស្សចំនួន ០៤នាក់ស្លាប់ និង០៥នាក់ផ្សេងទៀតបាត់ខ្លួន។ នេះបើតាមការចេញផ្សាយដោយ ទីភ្នាក់ងារព័ត៌មានចិន ស៊ីនហួរ នៅរសៀលថ្ងៃពុធ ទី១៩ ខែកក្កដា ឆ្នាំ២០១៧។
យោងតាមគណៈកម្មាធិការមជ្ឈិម ទទួលបន្ទុកទប់ស្កាត់ និងគ្រប់គ្រងគ្រោះមហន្តរាយ នៃប្រទេសវៀតណាម ព្យុះកំណាចខាងលើបានបណ្តាលឲ្យផ្ទះសម្បែងជាង ៥០ខ្នងដួលរលំ និងជាង ៤,២០០ខ្នងរងការខូចខាត។ ជាងនេះទៅទៀត វាបានបង្កឲ្យកប៉ាល់ និងទូកនេសាទចំនួន ៥៣គ្រឿង បូករួមជាមួយទូកសណ្តោងរបស់កងទ័ពជើងទឹកវៀតណាម ក៏ដូចជាសាឡង់ចំនួនពីរគ្រឿងផ្សេងទៀតលិចលង់។ ជាមួយគ្នានេះព្យុះត្រូពិក Talas ក៏បានបំផ្លិចបំផ្លាញផ្ទៃដីស្រែ និងចម្ការជិត ៥០,០០០ហិកតាថែមទៀតផង។
គួរបញ្ជាក់ថា នៅក្នុងអំឡុងពេល ០៦ខែដំបូងនៃឆ្នាំ២០១៧នេះ គ្រោះមហន្តរាយធម្មជាតិនៅក្នុងប្រទេសវៀតណាម បានផ្តាច់ជីវិត និងធ្វើឲ្យមនុស្សបាត់ខ្លួនសរុប ២៧នាក់, បង្ករបួសស្នាម ៣០នាក់, ធ្វើឲ្យខូចខាតផ្ទះសម្បែង ៥,៩០០ខ្នង, និងបំផ្លិចបំផ្លាញផ្ទៃដីដាំដុះប្រមាណ ១១,៤០០ហិកតា។ នេះបើតាមការិយាល័យស្ថិតិទូទៅរបស់វៀតណាម៕
