(ប៉េកាំង)៖ ស្របពេលវិស្សមកាលរដូវក្តៅ បានបន្តប្រព្រឹត្តទៅយ៉ាងប្រសើរ ទីផ្សារវិស័យទេសចរណ៍នៃប្រទេសចិននៅឯក្រៅស្រុក កំពុងតែមានការកើនឡើងខ្ពស់យ៉ាងក្តៅគគុក។ យោងតាមទិន្នន័យនាពេលថ្មីៗនេះ បានបង្ហាញឲ្យឃើញថា ភ្ញៀវទេសចរចិនប្រមាណ ៣០លាននាក់ ឬស្មើនឹង ៦០ភាគរយ ដែលកំពុងឈប់សម្រាកនារដូវក្តៅឆ្នាំ២០១៧នេះ នឹងធ្វើដំណើរទស្សនាកម្សាន្តនៅឯក្រៅប្រទេស។ នេះបើតាមការចេញផ្សាយដោយសារព័ត៌មានចិន CGTN នៅព្រឹកថ្ងៃព្រហស្បតិ៍ ទី១៤ ខែកក្កដា ឆ្នាំ២០១៧។
ប្រទេសដែលជាគោលដៅទេសចរណ៍កំពូលៗ សម្រាប់អ្នកដំណើរកម្សាន្តជនជាតិចិន នារដូវក្តៅនេះ រួមមានជប៉ុន និងបណ្តាប្រជាជាតិអាស៊ីអាគ្នេយ៍ ក៏ប៉ុន្តែប្រទេសដ៏ទៃផ្សេងទៀតក៏កំពុងតែក្លាយខ្លួនជាគោលដៅទេសចរណ៍ដ៏ពេញនិយម របស់ភ្ញៀវទេសចរចិនដូចគ្នាផងដែរ។ រុស្ស៊ីនិងអេមីរ៉ាត់អារ៉ាប់រួម រួមជាមួយនិងបណ្តាប្រទេសដែលស្ថិត ដែលនៅតាមបណ្តាយនៃគម្រោងផ្តួចផ្តើមវិថីមួយខ្សែក្រវាត់មួយរបស់ កំពុងតែមានភាពទាក់ទាញខ្លាំង សម្រាប់ភ្ញៀវទេសចរចិនចំណូលថ្មី។ ជាមួយគ្នានេះ ទីភ្នាក់ងារបម្រើសេវាទេសចរណ៍ជាច្រើន បានធ្វើការព្យាករណ៍ថា ចិននឹងបញ្ជូនភ្ញៀវទេសចរយ៉ាងតិច ២៥លាននាក់ ទៅកាន់បណ្តាប្រទេសក្នុងគម្រោងវិថីមួយខ្សែក្រវាត់មួយ ក្នុងឆ្នាំ២០១៧ នេះ។
គួរបញ្ជាក់ផងដែរថា ដើម្បីប្រមូលភ្ញៀវទេសចរឲ្យបានច្រើនតាមតែអាចធ្វើទៅបាន ប្រទេសជាច្រើនកំពុងតែខិតខំប្រឹងប្រែង ជួយសម្រួលការធ្វើដំណើរដល់ភ្ញៀវទេសចរចិន។ តួយ៉ាងប្រទេសស៊េបី និងបេឡារុស បានបង្កើតគោលនយោបាយយពុំចាំបាច់មានទិដ្ឋាការសម្រាប់ជនជាតិចិនដែលមានបំណងទៅធ្វើដំណើរកម្សាន្តនៅទីនោះ។ ដោយឡែកសម្រាប់កាណាដាវិញ កំពុងតែរៀបចំបង្កើតមជ្ឈមណ្ឌលសុំធ្វើទិដ្ឋាការចំនួន០៧កន្លែងបន្ថែមទៀតនៅប្រទេសចិនក្នុងឆ្នាំនេះ៕
