(វ៉ាស៊ីនតោន)៖ ប្រធានក្រុមតំណាងរាស្ត្រអាមេរិក លោកស្រី Nancy Pelosi បានសម្ដែងក្ដីព្រួយបារម្ភយ៉ាងខ្លាំង ពាក់ព័ន្ធនឹងការធ្វើតេស្ដមីស៊ីលផ្លោងឆ្លងទ្វីប ICBM របស់កូរ៉េខាងជើង កាលពីថ្ងៃអង្គារសប្ដាហ៍មុន ដែលលោកស្រីយល់ថា នេះគឺជាផ្លូវមួយនំាទីក្រុងព្យុងយ៉ាង ទៅកាន់ការប្រកួតប្រជែងក្នុងទីផ្សារលក់អាវុធ។ នេះបើតាមការចេញផ្សាយដោយ ទីភ្នាក់ងារសារព័ត៌មាន យ៉ុនហាប់ នៅព្រឹកថ្ងៃសុក្រ ទី១៤ ខែកក្កដា ឆ្នាំ២០១៧។
ថ្លែងទៅកាន់ក្រុមអ្នកសារព័ត៌មាន លោកស្រី Nancy Pelosi បានគូសបញ្ជាក់យ៉ាងដូច្នេះថា «ខ្ញុំមានហេតុផលជាច្រើន ដែលត្រូវព្រួយបារម្ភជាខ្លាំងចំពោះកូរ៉េខាងជើង។ ប៉ុន្តែក្នុងចំណោមហេតុផលទំាងនោះ ដូចអ្នកទំាងអស់គ្នាបានដឹងហើយ នោះគឺបច្ចេកវិទ្យាមីស៊ីល និងអាវុធនុយក្លេអ៊ែរកូរ៉េខាងជើង ការតែរីកចំរើនទៅមុខ ហើយនេះអាចជាផ្លូវមួយនំារបបកម្មុយនីស្ដដ៏ឯកោមួយនេះ មានលទ្ធភាពលក់មីស៊ីល និងបច្ចេកវិទ្យាដ៏គ្រោះដល់នរណាម្នាក់... មិនតែប៉ុណ្ណោះនៅពេលពួកគេ (កូរ៉េខាងជើង) សម្រេចជោគជ័យ ពួកគេនឹងនិយាយបែបនេះ មើលចុះ! យើងផលិតវាដើម្បីលក់។ តើអ្នកចង់ទិញវាទេ? យើងនឹងលក់វាឱ្យអ្នក»។
គួររំលឹកថា កាលពីថ្ងៃអង្គារសប្ដាហ៍មុន កូរ៉េខាងជើងបានប្រកាសថា ខ្លួនបានបាញ់សាកល្បងប្រកបដោយជោគជ័យ នូវមីស៊ីលផ្លោងឆ្លងទ្វីប Hwasong-14។ គ្រាប់មីស៊ីលនេះ ត្រូវបានធ្វើតេស្ដចេញពីតំបន់ Panghyon នៃខេត្ត Pyongan ខាងជើង ហើយវាអាចរត់បានចំងាយ ៩៣៣គីឡូម៉ែត្រ ព្រមទាំងអាចហោះបានរយៈកម្ពស់ដល់ទៅ ២,៨០២គីឡូម៉ែត្រក្នុងរយៈពេល ៣៩នាទី មុននឹងធ្លាក់ចូលសមុទ្រខាងកើត ឬសមុទ្រជប៉ុន។ ចំណែកឯសហរដ្ឋអាមេរិក ក៏បានទទួលស្គាល់ដែរថា កូរ៉េខាងជើងពិតជាបានបាញ់សាកល្បងមីស៊ីល ICBM ប៉ុន្តែរុស្ស៊ីអះអាងថា មីស៊ីលដែលកូរ៉េខាងជើងបានធ្វើតេស្ដ ជាមីស៊ីលរយៈចំងាយមធ្យមធម្មតាតែប៉ុណ្ណោះ៕
