(វ៉ាស៊ីនតោន)៖ ទីប្រឹក្សាជាន់ខ្ពស់របស់ប្រធានាធិបតីអាមេរិក លោក ដូណាល់ ត្រាំ បានថ្លែងឲ្យដឹងថា មេដឹកនាំនៃបណ្តាប្រទេសមានសេដ្ឋកិច្ចរីកចម្រើនជាងគេបំផុតទាំង២០ ឬហៅកាត់ថា G20 បានឯកភាពគ្នាកាលពីសប្តាហ៍មុនថា កូរ៉េខាងជើងបាននិងកំពុងបង្កការគំរាមកំហែងជាសកលយ៉ាងធ្ងន់ធ្ងរ ទោះបីជានៅក្នុងសេចក្តីថ្លែងការណ៍រួមរបស់ G20 មិនបានលើកឡើងពាក់ព័ន្ធនឹងរដ្ឋកុម្មុយនិស្តដ៏ឯកោមួយនេះយ៉ាងណាក៏ដោយ។ នេះបើតាមការចេញផ្សាយដោយ ទីភ្នាក់ងារព័ត៌មានកូរ៉េខាងត្បូង យុនហ៉ាប់ នៅព្រឹកថ្ងៃសុក្រ ទី១៤ ខែកក្កដា ឆ្នាំ២០១៧។
ការលើកឡើងបែបនេះ ត្រូវបានធ្វើឡើងដោយទីប្រឹក្សាសន្តិសុខជាតិ លោក H.R. McMaster ស្របពេលដែលរូបលោក បានធ្វើការសង្ខេបឲ្យដឹងអំពីសមិទ្ធិផលនៃដំណើរទស្សនកិច្ច នៅទ្វីបអឺរ៉ុបរបស់ លោក ដូណាល់ ត្រាំ កាលពីសប្តាហ៍មុន។ លោក McMaster បានថ្លែងយ៉ាងដូច្នេះថា «នៅក្នុងកិច្ចពិភាក្សាជាច្រើនជាមួយសម្ព័ន្ធមិត្ត និងដៃគូនានានៅឯកិច្ចប្រជុំកំពូល G20 មេដឹកនាំទាំងអស់ បានឯកភាពគ្នាថា កូរ៉េខាងជើងគឺជាការគំរាមកំហែងលក្ខណៈអន្តរជាតិដ៏ធ្ងន់ធ្ងរមួយ ដែលតម្រូវឲ្យមានចំណាត់ការរួម ប្រកបដោយភាពច្បាស់លាស់ និងប្រាកដប្រជា»។
គួរបញ្ជាក់ថា កិច្ចប្រជុំរយៈពេលពីរថ្ងៃ ដែលបានប្រព្រឹត្តទៅនៅឯទីក្រុង Hamburg នៃប្រទេសអាល្លឺម៉ង់ កាលពីថ្ងៃទី០៧-០៨ ខែកក្កដានេះ បានបិទបញ្ចប់ទៅកាលពីចុងសប្តាហ៍មុន ជាមួយនិងការសេចក្តីថ្លែងការណ៍រួមមួយ ដែលពុំមានការលើកឡើងណាមួយ ទាក់ទិននឹងប្រទេសកូរ៉េខាងជើងសូម្បីតែបន្តិចនោះឡើយ ទោះបីជាកិច្ចប្រជុំកំពូលនេះ ត្រូវបានធ្វើឡើងតែប៉ុន្មានថ្ងៃ ក្រោយពីរបបដឹកនាំទីក្រុងព្យុងយ៉ាង បានធ្វើការបាញ់សាកល្បងដោយជោគជ័យ នូវមីស៊ីលផ្លោងឆ្លងទ្វីបចំនួនមួយគ្រាប់ ដែលត្រូវបានអភិវឌ្ឍន៍ឡើង ដើម្បីវាយប្រហារដល់ដែនដីរបស់សហរដ្ឋអាមេរិកក៏ដោយ៕
