(ម៉ូស្គូ)៖ នៅពេលដែលកូរ៉េខាងជើង ធ្វើតេស្តបាញ់សាកល្បងគ្រាប់មីស៊ីលផ្លោងឆ្លងទ្វីប ដោយជោគជ័យជាលើកដំបូងកាលពីថ្ងៃទី០៤ ខែកក្កដាថ្មីៗនេះ យោធាសហរដ្ឋអាមេរិក មានឱកាសយ៉ាងងាយស្រួល ដើម្បីកម្ចាត់ប្រមុខដឹកនាំកំពូលផុតលេខរបស់ទីក្រុងព្យុងយ៉ាងគឺ លោក គីម ជុងអ៊ុន ចោល ក៏ប៉ុន្តែបានជ្រើសរើសមិនធ្វើយ៉ាងដូច្នោះវិញ។ នេះបើតាមអ្នកប្រឹក្សាយោបល់មួយរូប នៃក្រុមហ៊ុនវិភាគស្ថានការណ៍ភូមិសាស្រ្តនយោបាយនៅតំបន់អាស៊ីប៉ាស៊ីហ្វិក គឺលោក Rodger Baker ថ្លែងប្រាប់សារព័ត៌មាន Business Insider ដែលត្រូវបានដកស្រង់ និងចេញផ្សាយបន្តដោយសារព័ត៌មានរុស្ស៊ី Sputnik នៅព្រឹកថ្ងៃព្រហស្បតិ៍ ទី១៣ ខែកក្កដា ឆ្នាំ២០១៧។
កាលពីពេលថ្មីៗនេះ សារព័ត៌មាន The Diplomat បានលើកឡើងថា កាលពីអំឡុងនៃការបាញ់សាកល្បងមីស៊ីលផ្លោង ICBM លោក គីម ជុនអ៊ុន ត្រូវគេរាយការណ៍ថា បានបន្តមានវត្តមាននៅលើវេទិកាក្នុងទីតាំងធ្វើតេស្ត ហើយបានចំណាយពេលជក់បារីអស់រយៈពេលជាងមួយម៉ោងដែលប្រការនេះបានអនុញ្ញាតឲ្យយោធា និងទីភ្នាក់ងារស៊ើបការណ៍សម្ងាត់របស់សហរដ្ឋអាមេរិក មានឱកាសសម្លាប់លោកមេដឹកនាំរបស់កូរ៉េខាងជើងបានយ៉ាងងាយ។
ជុំវិញរឿងនេះ លោក Rodger Baker បានបកស្រាយថា យោធាអាមេរិកជាទូទៅដឹងច្បាស់ថា នៅពេលណាដែលការធ្វើតេស្តមីស៊ីលរបស់កូរ៉េខាងជើង នឹងត្រូវធ្វើឡើង ក៏ប៉ុន្តែមិនធ្លាប់ដែលបានបើកការវាយឆ្មក់ណាមួយ ដើម្បីបញ្ឈប់សកម្មភាពនោះឡើយ។ យ៉ាងណាមិញ ជាគឺជារឿងមិនធម្មតាមួយ ដែលទីក្រុងវ៉ាស៊ីនតោនបានអនុញ្ញាតឲ្យលេចធ្លាយព័ត៌មានថា លោក គីម ជុងអ៊ុន អាចត្រូវបានកម្ចាត់ចោល តែកងទ័ពអាមេរិកបានសម្រេចជ្រើសរើសមិនធ្វើយ៉ាងដូច្នោះទៅវិញ។
លោក Baker មានជំនឿជឿជាក់ថា វាអាចទៅរួចដែលថា សហរដ្ឋអាមេរិកបានអនុញ្ញាតឲ្យលេចធ្លាយព័ត៌មាននេះ ដោយចេតនា ដើម្បីបង្ហាញថា ទីក្រុងវ៉ាស៊ីនតោនមិនចង់សម្លាប់លោក គីម ជុងអ៊ុន តាមរយៈឱកាសនានាដែលខ្លួនមាននោះឡើយ ដោយសង្ឃឹមថា សូម្បីតែនិមិត្តសញ្ញានៃសន្តិភាពដ៏តូចមួយបែបនេះក្តី អាចនឹងបញ្ចុះបញ្ចូលឲ្យកូរ៉េខាងជើង បន្ថយល្បឿននៃការអភិវឌ្ឍន៍កម្មវិធីនុយក្លេអ៊ែរ និងមីស៊ីលផោ្លងរបស់ខ្លួន។ ដោយឡែកលោក Baker បានបញ្ជាក់ទៀតថា ព័ត៌មាននេះអាចមានអត្ថន័យមួយផ្សេងទៀតថា លោក គីម មិនមែនគ្មានចំណុចខ្សោយនោះឡើយ ហើយបើសិនជាកម្មវិធីអាវុធប្រល័យលោក នៅតែបន្តដោយឥតគ្មានការកោតក្រែងទៀតនោះ សហរដ្ឋអាមេរិក អាចបើកការវាយប្រហារទាំងកូរ៉េខាងជើង និងលោក គីម បានភ្លាមៗ។
គួរបញ្ជាក់ថា យោងតាមសារព័ត៌មាន Business Insider នៅរាល់ពេលដែលមីស៊ីលកូរ៉េខាងជើង ត្រូវបានបាញ់បង្ហោះធ្វើតេស្ត វីដេអូជាច្រើនតែងតែបានបង្ហាញពីសកម្មភាព ប្រមុខដឹកនាំកំពូលផុតលេខរបស់ទីក្រុងព្យុងយ៉ាងរូបនេះ ធ្វើការទស្សនាដោយផ្ទាល់នៅឯទីតាំងនៃការសាកល្បងនោះ៕
