​(តូក្យូ)៖ យន្ដហោះចម្បាំង ១២០គ្រឿង ប្រតិបត្តិការនៅលើនាវាផ្ទុកយន្ដហោះចម្បាំងអាមេរិក ដែលកំពុងធ្វើការល្បាតនៅតំបន់ប៉ាស៊ីហ្វិកខាងលិច ត្រូវបានគេគ្រោងនឹងផ្លាស់ប្ដូរ​ទីតាំងទៅ​កាន់ទីក្រុង Iwakuni នៃខេត្ត Yamaguchi បន្ទាប់ពីបានឈរជើងនៅខេត្ត Kanagawa​ ជាយូរមកហើយ។ គំរោងផ្លាស់ទីតាំងនេះ ធ្វើឡើងស្របពេលមានការតវ៉ាពីប្រជាជន កាន់តែខ្លាំងឡើង​នៅក្នុងតំបន់ ដែលបានអូសបន្លាយរយៈពេលរាប់​ទសវត្សរ៍មកហើយ ដោយសារតែយន្ដហោះទំាងនេះបានបំពុលបរិស្ថានពួកគេរស់នៅ។ នេះបើតាមសារព័ត៌មាន Japan Times ដកស្រង់ដោយសារព័ត៌មាន Sputnik នៅរសៀលថ្ងៃពុធ ទី១២ ខែកក្កដា ឆ្នាំ២០១៧។

យោង​តាម Japan Times អភិបាល​ក្រុង Iwakuni លោក Yoshihikio Fukuda និងអភិបាល​ខេត្ត Yamaguchi លោក Tsumasa Muraoka បានជូនដំណឹង​ដល់អ្នកនាំពាក្យ​រដ្ឋាភិបាល​ជប៉ុន លោក Yoshihide Suga រួចហើយ ពាក់ព័ន្ធនឹង​ការព្រមព្រៀងគ្នា​ លើការផ្ទេរយន្ដហោះចម្បាំង​ទៅកាន់តំបន់ក្បែរ​សមុទ្រខាងកើត។ សារព័ត៌មាន​នេះបញ្ជាក់​ដូច្នេះថា «លោក Suga ​បានបង្ហាញពីបំណងចង់​សហការជាមួយ​ក្រុមមន្ត្រី​នៅក្នុងតំបន់ ហើយរដ្ឋាភិបាល​ទីក្រុងតូក្យូ នឹងព្យាយាម​ជួបជាមួយម្ចាស់​សំណើ​មកពីសហគមន៍​នៅក្នុងតំបន់»។

គួរបញ្ជាក់ថា ប្រជាជនជប៉ុន​រស់នៅក្នុង​ទីក្រុង Yamato និងទីក្រុង Ayase នៃខេត្ត Kanagawa បានតវ៉ាជំទាស់​នឹងរដ្ឋាភិបាល​ទីក្រុងតូក្យូ តំាងតែពីឆ្នាំ​១៩៦០មកម្លេះ ចំពោះការ​បំពុល​បរិស្ថាន​ពីយន្ដហោះ​ចម្បាំងអាមេរិក ដែលឈរជើង​នៅក្នុងតំបន់។ ប៉ុន្តែការផ្លាស់​ប្ដូរទីតាំង ទៅតំបន់ជិត​សមុទ្រចិន​ខាងកើត អាចនឹងធ្វើឱ្យ​គិតផ្សេងពីនេះ​ទៅវិញ ត្បិតសមុទ្រ​ចិនខាងកើត គឺជាតំបន់ជម្លោះ​ដែនទឹក​រវាងចិន និងជប៉ុន ដូច្នេះចង់​ឬមិនចង់ គំរោងផ្ទេរនេះ អាចនឹងមាន​បំណងឃ្លំាមើល​សកម្មភាពយន្ដហោះ​ចម្បាំងចិន ដែលតែងតែ​ហោះល្បាត​ជារឿយៗពីលើតំបន់​ជម្លោះនេះ៕