(​មូស្គូ)៖ សហរដ្ឋអាមេរិក និងបណ្តាប្រទេសមួយចំនួននៅទ្វីបអឺរ៉ុបជាប់ព្រំដែនប្រទេសរុស្ស៊ី នៅថ្ងៃអង្គារនេះ បានផ្ដើមធ្វើ​សមយុទ្ធយោធាទ្រង់​ទ្រាយធំរួម​គ្នា​ឈ្មោះថា Saber Guardian 17​​ ដែលរៀបចំ​ឡើងដោយ​ប្រទេសប៊ុលហ្គារី ហុងគ្រី និងរូម៉ានី។ នេះបើតាម​ការចេញផ្សាយ​ដោយសារព័ត៌មាន Sputnik នៅរសៀលថ្ងៃអង្គារ ទី១១ ខែកក្កដា ឆ្នាំ២០១៧។

យោងតាម​យោធាអាមេរិក សមយុទ្ធ​យោធានេះ​ចាប់ផ្ដើមពីថ្ងៃទី១១ រហូតដល់​ថ្ងៃទី២០ ខែកក្កដា ដោយមានការ​ចូលរួមពី​យោធា ២៥,០០០នាក់ មកពី​ប្រទេសជាសម្ព័ន្ធ​មិត្តអាមេរិក​ចំនួន ២២ ក្នុងតំបន់។ ក៏ប៉ុន្តែការធ្វើ​សមយុទ្ធយោធា​របៀបនេះ អាចនឹង​ធ្វើឱ្យទំនាក់ទំនង​រវាងទីក្រុងម៉ូស្គូ និងទីក្រុង​វ៉ាស៊ីនតោន កាន់តែតានតឹង​ឡើង ត្បិតសម្រាប់​រុស្ស៊ីការធ្វើ​សមយុទ្ធយោធា​នៅតាមបណ្ដាប្រទេសជាប់​របងជាមួយខ្លួន​ គឺជាការ​គំរាមកំហែង​មួយមកលើ​សន្តិសុខជាតិ។

គួរបញ្ជាក់ថា សមយុទ្ធយោធា Saber Guardian 17​​ នៅឯតំបន់​សមុទ្រខ្មៅ នឹងត្រូវប្រព្រឹត្ត​ទៅក្រោមវត្ថុបំណង បណ្ដុះ​បណ្ដាល និងចែករំលែក​បទពិសោធន៍​ឱ្យគ្នាទៅវិញទៅមក ដើម្បីធ្វើ​ឱ្យប្រសើរឡើង​នូវ​ការធ្វើប្រតិកម្មរួមគ្នា នៅក្រោមទី​បញ្ជាការ​តែមួយ៕