(វ៉ាស៊ីនតោន)៖ ការិយាល័យ​ស៊ើបអង្កេតសហព័ន្ធ ឬហៅកាត់​ថា FBI របស់​សហរដ្ឋអាមេរិក បានធ្វើការចាប់​ខ្លួន​នាយទាហាន​អាមេរិក​ម្នាក់ ដែលមានមូលដ្ឋាន​ឈរជើងនៅ​ក្នុងរដ្ឋហាវ៉ៃ ដោយសង្ស័យថា មានជាប់ពាក់ព័ន្ធ​ជាមួយ​ក្រុមភេរវករ ISIS។ នេះបើតាម​សេចក្តី​រាយ​ការណ៍​ពីបណ្តាញ​សារព័ត៌មាន​អាមេរិក ដកស្រង់​ដោយ​សារព័ត៌មានរុស្ស៊ី Sputnik នៅព្រឹក​ថ្ងៃអង្គារ ទី១១ ខែកក្កដា ឆ្នាំ២០១៧។

យោងតាមសារព័ត៌មាន​អាមេរិក Hawaii News Now (HNN) ដែលបាន​ដកស្រង់សម្តីរបស់​អ្នកនាំពាក្យ​ទីភ្នាក់ងារ FBI លោក Arnold Laanui អះអាងថា ជនសង្ស័យជានាយទាហានខាងលើនេះមានឈ្មោះ Ikaika Erik Kang អាយុ ៣៤ឆ្នាំ ស្ថិតនៅក្នុងអង្គភាព​ថ្មើរជើងលេខ២៥ នៃ​កងទ័ពជើងគោក​អាមេរិក ​ដែលមានមូលដ្ឋាន​នៅបន្ទាយ Schofield នៃក្រុង Wahiawa។

គួរបញ្ជាក់ថា លោក Kang ដែលបានស្ថិត​ក្រោមការស៊ើប​អង្កេត​រាប់ឆ្នាំរបស់ FBI នេះ​នឹងចូល​បង្ហាញខ្លួន​ជាលើកទីមួយ នៅឯតុលាការ​​សហព័ន្ធ​នា​ពេលប៉ុន្មានម៉ោង​ខាងមុខនេះ៕