(វ៉ាស៊ីនតោន)៖ ព្រឹទ្ធសមាជិកសភាអាមេរិក លោក John McCaian​ បាននិយាយថា សហរដ្ឋអាមេរិក កំពុងចាញ់សង្រ្គាមនៅអាហ្វហ្គានីស្ថាន ជាទីដែលទីក្រុងវ៉ាស៊ីនតោន បានដឹកនាំ ប្រតិបតិ្តការយោធាគាំទ្ររដ្ឋាភិបាលទីក្រុងកាប៊ុល អស់រយៈពេលជាង១៦ឆ្នាំមកនេះ។ នេះបើតាមការចេញផ្សាយដោយសារព័ត៌មាន Sputnik នៅថ្ងៃចន្ទ ទី១០ ខែកក្កដា ឆ្នាំ២០១៧។

ការថ្លែងបែបនេះរបស់ លោក McCain ធ្វើឡើងនៅក្នុងបទសម្ភាសន៍ជាមួយស្ថានីយ៍ទូរទស្សន៍ CBS ដោយលោកថែមទាំងបញ្ជាក់ទៀតថា បញ្ហាធំគឺស្ថិតនៅលើសេតវិមាន ដែលមិនទាន់ ចេញយុទ្ធសាស្ត្រជាក់លាក់ណាមួយ ដោយសារតែ​ «ចលាចលផ្ទៃក្នុង»។ ព្រឹទ្ធសមាជិកមកពីរដ្ឋអារីហ្សូណារូបនេះ បានលើកឡើងដូច្នេះថា៖ «យើងមិនមានយុទ្ធសាស្ត្រ ដូច្នេះយើងនឹង បរាជ័យ ហើយនៅពេលអ្នកមិនបានទទួលជ័យជម្នះ គឺអ្នកនឹងបរាជ័យ រីឯកងទ័ពជាតិអាហ្វហ្គានីស្ថាន នឹងមិនអាចទទួលយកបរាជ័យនេះឡើយ»។

គួរបញ្ជាក់ថា សហរដ្ឋអាមេរិក និងសម្ព័ន្ធមិត្ត បានធ្វើប្រតិបត្តិការយោធានៅអាហ្វហ្គានីស្ថាន តំាងតែពីឆ្នាំ២០០១មកម្លេះ បន្ទាប់ពីមានមហាភេរវកម្មថ្ងៃទី១១ ខែកញ្ញា។ បេសកកម្មយោធា នៅក្នុងប្រទេសនេះ បានបញ្ចប់កាលពីថ្ងៃទី២៨ ខែធ្នូ​ ឆ្នាំ២០១៤ ហើយរហូតដល់ថ្ងៃទី០១ ខែមករា ឆ្នាំ២០១៥ ទើបអង្គការណាតូ ប្រកាសបន្តបេសកកម្មថ្មី ដើម្បីជួយកងកម្លាំងអាហ្វហ្គានី ស្ថាន ក្នុងការប្រយុទ្ធប្រឆាំងជាមួយក្រុមឧទ្ទាមតាលីបង់ ដោយបន្សល់ទុកកងទ័ពណាតូ៥,០០០នាក់។ ក៏ប៉ុន្តែ ប្រឈមមុខនឹងការពង្រីកឥទ្ធិពលកាន់តែខ្លាំងរបស់ក្រុមតាលីបង់ ក្រសួងការ ពារជាតិអាមេរិក មានគំរោងបញ្ជូនកងទ័ពបន្ថែម ៤,០០០នាក់ជាថ្មី ទៅកាន់ប្រទេសអាហ្វហ្គានីស្ថាន។​ នេះបើតាមប្រព័ន្ធផ្សព្វផ្សាយអាមេរិក៕