(ឡូសអាន់ជឺឡែស)៖ អភិបាលរដ្ឋកាលីហ្វរញ៉ា លោក Jerry Brown បានប្រកាសដាក់តំបន់ជនបទ Butte ក្នុងភាពប្រកាសអាសន្ន កាលពីរសៀលថ្ងៃអាទិត្យ (ម៉ោងនៅសហរដ្ឋអាមេរិក) ខណៈក្រុមអ្នកពន្លត់អគ្គិភ័យជិត ៥,០០០នាក់ បាននិងកំពុងប្រយុទ្ធតស៊ូជាមួយអណ្ដាតភ្លើងឆេះព្រៃឈ្មោះ «Wall Fire» ឬ «ជញ្ជាំងភ្លើង» ដែលបាន និងកំពុងគំរាមកំហែងដល់ផ្ទះ ៥,៤០០ខ្នង។ នេះ បើតាមការចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅរសៀលថ្ងៃចន្ទ ទី១០ ខែកក្កដា ឆ្នាំ២០១៧។
ភ្លើងឆេះព្រៃ Wall Fire បានចាប់ផ្ដើមឆេះកាលពីថ្ងៃសុក្រសប្ដាហ៍មុន ចេញពីសហគមន៍ Oroville នៃតំបន់ Butte ស្ថិតនៅចំងាយ ៧៨០គីឡូម៉ែត្រពីទីក្រុងឡូសអាន់ជែឡែស ដោយវាបានបង្ខំឱ្យអាជ្ញាធរជម្លៀសប្រជាជនច្រើនជាង ៤,០០០នាក់ ទៅកាន់ទីទទួលមានសុវត្ថិភាព រីឯមនុស្ស ៧,៤០០នាក់ ត្រូវបានដាក់ឱ្យនៅក្រោមការព្រមានពីការជម្លៀសខ្លួន នៅម៉ោង២៖០០នាទីរសៀសថ្ងៃអាទិត្យ (ម៉ោងនៅសហរដ្ឋអាមេរិក)។ ក៏ប៉ុន្តែភ្លាមៗ ពុំទាន់មានសេចក្ដីរាយការណ៍ពីជនរងគ្រោះ និងទំហំខូចខាតនៅឡើយ។
គួរបញ្ជាក់ថា បើតាមព័ត៌មានបឋមពីក្រុមពន្លត់អគ្គិភ័យ ភ្លើងឆេះព្រៃដ៏កំណាចនេះ កំពុងឆាបឆេះនៅតំបន់នៅតាមចំនួន ១៤កន្លែង នៃរដ្ឋកាលីហ្វ័រញ៉ា ក្នុងនោះតំបន់ San Luis Obispo អគ្គិភ័យបានឆេះនៅលើផ្ទៃដី ៩៧.១២គីឡូម៉ែត្រក្រឡា និងតំបន់ Santa Barbara ៣១.៥៦គីឡូម៉ែត្រក្រឡា៕
