(ឡុងដ៍)៖ ក្រុមអ្នកពន្លត់អគ្គីភ័យកំពុងតែត្រដាបត្រដួស ក្នុងការពន្លត់ភ្លើងឆេះផ្សារទំនើបមួយមានឈ្មោះថា Camden ដ៏ពេញនិយមស្ថិតនៅភាគខាងជើងទីក្រុងឡុងដ៍ នៃចក្រភពអង់គ្លេស ដែលបានឆាបឆេះនៅពេលទៀបភ្លឺឈានចូលថ្ងៃចន្ទសប្តាហ៍ថ្មីនេះ។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ិនហួរ នាព្រឹកថ្ងៃចន្ទ ទី១០ ខែកក្កដា ឆ្នាំ២០១៧។
អគ្គីភ័យបានចាប់ផ្តើមទន្ទ្រានពីជាន់ទីពីរនៃផ្សារទំនើប Camden ដែលនាំឲ្យដំបូលនៃផ្សារត្រូវភ្លើងឆេះជាបន្តបន្ទាប់នាំផ្សែងហុយខ្មួលខ្មាញ់ពាសពេញភាគខាងជើងទីក្រុង ខណៈក្រុមពន្លត់អគ្គីភ័យមានគ្នាជាង ៧០នាក់ បាន និងកំពុងព្យាយាមពន្លត់ដោយប្រើប្រាស់ឡានទឹក ១០គ្រឿង។ រហូតមកដល់ពេលនេះ មិនទាន់មានសេចក្តីរាយការណ៍ណាមួយ អំពីមនុស្សរងរបួស ឬបាត់បង់ជីវិតនោះឡើយ។
គួរបញ្ជាក់ថា ការឆេះផ្សារទំនើបខាងលើនេះ បានកើតមានឡើងជិតមួយខែ បន្ទាប់ពីការឆេះអគារខុនដូកម្ពស់ ២៤ជាន់នៅទីក្រុងឡុងដ៍ដូចគ្នា កាលពីថ្ងៃទី១៤ ខែមិថុនា បានបណ្តាលឲ្យមនុស្ស ៨០នាក់ស្លាប់ ក្នុងអគ្គីភ័យដែលមានរយៈពេលរហូតដល់ទៅ ១៦ម៉ោង៕
