(អាល្លឺម៉ង់)៖ កិច្ចប្រជុំកំពូល G20 ឆ្នាំ២០១៧នេះ មិនមែនមានស្ថានភាពល្អដូចបណ្តាឆ្នាំមុនៗនោះឡើយ ដោយនៅ​ទីក្រុង​ Hamburg ប្រទេសអាល្លឺម៉ង់ ដែលជាម្ចាស់ផ្ទះនៃកិច្ចប្រជុំនេះ កំពុងលក់មុខមិនស្ទើរនោះទេ ព្រោះទីតាំងដែលរដ្ឋាភិបាលបានត្រៀមទុក សម្រាប់ទទួលបណ្តាមេដឹកនាំកំពូលៗនៃពិភពលោក បានប្រែក្លាយ​ជាទីលានដ៏ក្តៅគគុក​នៃ​ការតវ៉ាប្រឆាំងកិច្ចប្រជុំ G20​។

ជាមួយគ្នានោះដែរ អធិការបតីអាល្លឺម៉ង់ លោកស្រី អាន់ជែលឡា មឺគែល បានថោ្កលទោសយ៉ាងខ្លាំងចំពោះក្រុមបាតុករហិង្សា ខណៈក្រុមអ្នករៀបចំការតវ៉ា​ អះអាងថា មនុស្សដល់ទៅ ២០០,០០០នាក់ បានចូលរួមបាតុកម្មតវ៉ាប្រឆាំងនឹង G20 តែបើតាមប៉ូលិលអាល្លឺម៉ង់ ក្រុមបាតុករមានគ្នា ២២,០០០នាក់ និង ៥០,០០០នាក់នៅពេលបាតុកម្មតវ៉ាបញ្ចប់។ ជាងនេះទៅទៀត អាជ្ញាធរអាល្លឺម៉ង់ បានប៉ាន់ប្រមាណទំហំខូចខាតរាប់រយលានដុល្លារឯណោះ ជាក់ស្ដែងគ្រាន់តែ ម្ចាស់ហាងម្នាក់បានអះអាងថា ខ្លួនបានបាត់បង់ទ្រព្យសម្បត្តិ គិតជាទឹកប្រាក់ ៤៥៦,០០០ដុល្លារទៅហើយ។ ប៉ុន្តែទន្ទឹមគ្នាអធិការបតីអាល្លឺម៉ង់ លោកស្រី ​អាន់ជែលឡា មឺគែល សន្យាថា រដ្ឋាភិបាលនឹងផ្ដល់សំណងដល់អ្នកដែលបានបាត់បង់ហិរញ្ញវត្ថុដោយសារតែបាតុកម្មតវ៉ានេះ។

ទស្សនាកម្រងរូបភាព នៃការតវ៉ាប្រឆាំង​ដ៏ក្តៅគគុកចំពោះកិច្ចប្រជុំ G20 និងការបង្ក្រាបហ្វូងបាតុករយ៉ាងសាហាវ ពីសំណាក់កងកម្លាំងប៉ូលិសអាល្លឺម៉ង់៖