(តូក្យូ)៖ យោធាកូរ៉េខាងត្បូង​បានអះអាងថា យន្តហោះចម្បាំង F-15 និង F-16 របស់ខ្លួនបានចូលរួមជាមួយនិង​យន្តហោះទម្លាក់គ្រាប់បែកអាមេរិក B-1B ដ៏មានអានុភាពបំផុត ដើម្បីហោះហើរលើទឹកដីកូរ៉េខាងត្បូង ក្នុងន័យការពារ និងឆ្លើយតបភ្លាមៗ ចំពោះសកម្មភាព​បង្កហេតុណាមួយបន្ថែមទៀត ពីសំណាក់កូរ៉េខាងជើង ក្រោយការធ្វើតេស្តមីស៊ីលអន្តរទ្វីប ICBM ជោគជ័យកាលពីថ្ងៃអង្គារសប្តាហ៍នេះ។ នេះបើតាម​ការចេញផ្សាយ​ដោយសារព័ត៌មាន Sputnik នាព្រឹកថ្ងៃសៅរ៍ ទី០៨ ខែកក្កដា ឆ្នាំ២០១៧។

លើកនេះយន្តហោះ​ទម្លាក់​គ្រាប់បែក B-1B អមដំណើរ​ដោយយន្តហោះចម្បាំង​បីគ្រឿងខាងលើនេះ ត្រូវបានបញ្ជូន​ទៅធ្វើការហោះហើរ​ពីខេត្ត Gangwon ភាគឦសាន​កូរ៉េខាងត្បូង ដែលស្ថិត​ជិតព្រំដែន​​កូរ៉េខាងជើង ហើយ​សកម្មភាព​នេះ ត្រូវបាន​យោធាប្រទេស​សម្ព័ន្ធមិត្ត​ទាំងពីរ​អះអាងថា ជាការពង្រឹងសមត្ថភាព​វាយប្រហារ ដើម្បីទប់ទល់​នឹងការបង្កហេតុ​ណាមួយ។

គួរបញ្ជាក់ថា កាលពីថ្ងៃសុក្រម្សិលមិញនេះ យន្តហោះទម្លាប់គ្រាប់បែក​រយៈចម្ងាយឆ្ងាយ​របស់អាមេរិកពីរគ្រឿង ក៏បានហោះហើរ​ពីលើ​ដែនសមុទ្រចិនខាងត្បូងផងដែរ ខណៈដែល​ប្រធានាធិបតីចិន ស៊ី ជិពីង និងប្រធានាធិបតី​អាមេរិក ដូណាល់ ត្រាំ កំពុងស្ថិត​នៅក្នុង​ទីក្រុង Hamburg ប្រទេសអាល្លឺម៉ង់ ដើម្បីចូលរួមកិច្ចប្រជុំ G20 ដោយទង្វើនេះបានបង្ក​ជាភាពក្តៅ​ក្រហាយ​យ៉ាងខ្លាំង ពីសំណាក់​ទីក្រុងប៉េកាំង៕