(តូក្យូ)៖ ទឹកជំនន់ ដែលបង្កឡើងដោយភ្លៀងធ្លាក់យ៉ាងគំហុក មិនធ្លាប់មានក្នុងរយៈពេល ៤០ឆ្នាំមកហើយ​ នៅកោះគ្យូស៊ុ ភាគខាងត្បូងប្រទេសជប៉ុន បានបណ្តាលឲ្យមនុស្ស ១៥នាក់ស្លាប់ ខណៈតំបន់ដែល​ពួកគេរស់នៅត្រូវបានទឹកទន្លេឡើងខ្ពស់ និងជន់លិច ព្រមទាំងបង្កជាការបាក់ដី​ផងដែរ។ នេះបើតាមការ​ចេញ​ផ្សាយដោយ​សារព័ត៌មាន Sputnik នាព្រឹកថ្ងៃសៅរ៍ ទី០៨ ខែកក្កដា ឆ្នាំ២០១៧។

អាជ្ញាធរជប៉ុនបានអះអាងថា ក្រុមសង្គ្រោះពីដំបូងឡើយគឺពិបាកនៅ​ក្នុងការធ្វើដំណើរទៅកាន់​កន្លែងរងគ្រោះ ដែលស្ថិតនៅតំបន់ដាច់ស្រយាលនៃកោះ គ្យូស៊ុ នោះណាស់ ក៏ព្រោះតែទឹកជំនន់ និងភ្លៀងធ្លាក់យ៉ាងសន្ធប់ បានបង្កឲ្យដើមឈើរលំ ព្រមទាំងដីបាក់មកលើដងផ្លូវនានា ដែលនាំឲ្យចរាចរណ៍រាំងស្ទះ។ បច្ចុប្បន្ននេះ ប្រជាជនជប៉ុន​ប្រមាណ ២,២០០នាក់ កំពុងរស់នៅក្នុង​ជម្រកបណ្តោះអាសន្ន​នៅឡើយ៕